Proposta lei OJE 2025 ne’e pasa ho votu a-favor 42, abstensaun 22 no kontra zero.
Iha intervensaun ikus, Primeiru-Ministru (PM), Kay Rala Xanana Gusmão husu ba deputadu sira husi bankada opozisaun atu kontinua hato’o krítika bá Governu.
“Husi Bankada opozisaun sira saida mak hatene katak viola ida ne’e, ida ne’e fó de’it no la iha tranferensia, foti par ita hotu kuriji, tanba saida mak ita hakarak ne’e atu servi povu ida ne’e, ho osan boot ho osan kiik ho hanoin atu halo ida ne’e, ho hanoin atu halo Ida ne’ebá, povu hili ita atu servi nasaun ida ne’e”, dehan Primeiru Ministru liu husi nia intervensaun ikus iha debate OJE iha faze jeneralidade, Sesta (08/11).
Xefe Governu hatutan, lori IX Governu Konstitusionál agradese bá krítika hotu-hotu liu-liu husi bankada opozisaun, nune’e Governu rona ho atensaun atu bele implementa planu no programa di’ak hodi haree bá povu nia moris.
“Bainhira hotu-hotu ho intensaun atu serví povu maka bele bolu Governu atu hato’o progressu servisu dala-rua kada fulan perante reprezentante povu no públiku”tenik PM Xanana.
Iha iha biban ne’e, Xefe Governu mós bolu atensaun bá membru Governu atu iha responsabilidade bá povu no bá Parlamentu Nasionál.
Enkuantu, Debate ba proposta lei OJE 2025, iha faze jeneralidade ne’ebé hala’o durante tolu hahú husi loron 6 to’o loron 8 fulan outubru tinan ne’e.
Entretantu, proposta lei OJE 2025 ho montante dolar amerikanu billaun $2.6 ne’ebé governu dasia propoin sei investe ba iha setór produtivu sira hanesan, infreastrutura, edukasaun, saúde, protesaun sosial no ambiental no mós setór petrolifero.
Bá investimentu infreastrutura, Primeiru Ministru haktuir, iha OJE 2025 aloka tokon $654, husi total ne’e, tokon $440 aloka ba kapital dezenvolvimentu, ne’ebé la limita deit ba konstrusaun estrada no ponte maibé atu permite asesu ba malu husi povu, komersiu no oportunidade.
