Deputada husi Bankada FRETILIN, Nurima Ribeiro Alkatiri hatete, bankada opozisaun husi FRETILIN fó votus abstensaun tanba durante loron tolu iha debate Orsamentu Jeral Estadu, governu liuliu Primeiru Ministru Kay Rala Xanana Gusmåo la fó resposta bá preukupasaun sira ne’ebé bankanda opozisaun sira hato’o.
“Fó votus Abstensaun iha Jeneralidade tanba preokupasaun ne’ebé aprezenta husi Deputadu bankada FRETILIN no mós husi Deputadu bankanda seluk, peokupasaun ne’ebé pertinentes tebes relasiona ho setór sira importante ba povu nia moris la hetan resposta husi Governu no Xefe Governu,” dehan Deputada Nurima iha PN, Sesta (08/11).
Deputada Nurima hatutan, deklarasaun husi Primeiru Ministru la responde prekupasaun ne’ebé bankada opozisaun sira aprezenta, nune’e FRETILIN deside hodi vota abstensaun ba iha faze jeneralidade, atu hare ba parte espesialidade iha proposta sira ne’ebé sira aprezenta atu hadi’a orsamentu ne’e no benifisia ba povu.
“Nune’e osan ne’e bele ajuda hadia situasaun saúde, agrikultura, edukasaun no seluk tan ne’ebé afeita direita ba povu nia moris, no depende mós bá dinámika espesialidade mak ita sei hare governu iha vontade nakloke duni atu hadia orsamentu nee ka lae?,” tenik Deputada Nurima.
Iha fatin hanesan, Prezidente Bankada PLP, Deputada Maria Angelina Lopes Sarmento hatete, durante loron tolu iha debate Orsamentu Jeral Estadu iha faze jeneralidade, bankada opoziasaun iha nia deklarasaun no intervensaun hato’o perguntasa no kritiku barak bá governu kona-bá tetu orsamentu 2025 nian, ne’ebé governu submete ho total billaun $2.617 dolares.
Deputada ne’e dehan, tuir sira nia pontu devista hare katak osan ne’e boot no hare fali ba dezempeñu ezekusaun 2024 nian, bele dehan ezekusaun ne’ebé la inspira atu hatudu katak governu la iha seriedade atu bele ezekuta osan 2024 nian ne’ebé Parlamentu Nasional aprova ona.
“Ami nia votus abstensaun ba orsamentu 2025 nian, liuliu tanba ami hare katak iha espasu ba bankada opozisaun atu bele halo proposta alterasaun bá setór xave sira ne’ebé sai preukupasaun ba bankada opozisaun nian, tanba governu fó liu prioridade ba investimentu iha setór petrolifera, atu bele viabiliza Primeiru Ministru nia deklarasaun, viabiliza projetu greater sunrise nian mai Timor-Leste,” dehan Deputada Maria Angelina.
Prezidente Bankada PLP ne’e afirma, husi parte seluk sira hare katak projetu greater sunrise labele la’o mesak, sem iha dependensia husi ministeriu sira seluk ne’ebé interligadu inklui Ministeriu agrikultura Pekuaria, Peskas no Florestas, Ministeriu Turizmu no mós Ministeriu sira ne’ebé bele estimula kresimentu ekonomiku atu redus depedensia ba fundu petriliferu iha futuru.
Ho votu abstensaun ne’e, Deputada Bankada PLP hein katak, Governu bele nakloke atu simu proposta alterasan sira ne’ebé bankada opoziasaun prepara ona.
Tanba tuir sira, iha setór save importante sira atu estimula kresimentu ekonomiku naun petriloferu ne’ebé durante tinan barak tau osan, maibé Governu la fó prioridade atu dezenvolve diak liu.
Enkuantu, Prezidente Bankada KHUNTO, Deputadu, Antonio Verdial, hateten, ko’alia kona-bá konseitu jeral estadu ne’ebé hanesan raan ba estadu, bankada opozisaun nafatin iha konsensia hodi fó biban ba Governu atu hala’o knar iha prosesu dezenvolvimentu rai ida ne’e.
