Hafoin aula desportiva ne’e la’o, Eis Jogadór Desportiva Tebe-bola Profisional Japaun, Masao Kiba husu ba labarik sira atu atensaun, tanba tempu ba hanorin ne’e limitadu.

Nia mós dehan, hanorin ne’e la’os ba tebe bola de’it, maibé ba mós mentalidade labarik sira nia tan ne’e nia husu labarik sira atu tau atensaun hodi halo tuir.

“La’os ha’u deit mak fó hanorin maibé estudante voluntariu sira mós fó hanorin, tanba tempu limitadu, hanesan ohin (horseik) ha’u ko’alia, bainhira formadór koalia, sira tenki rona no halo tuir, tanba la’os hanorin de’in ba tebe bola maibé bá mós mentalidade no atetude tan ne’e sira tenki rona,” dehan Masao Kiba iha Manleu, Domingo (10/11).

Iha fatin hanesan, Prezidente Konsellu Asosiasaun Kristaun Joventude Timor-Leste Marcos Pinto hatete, Asosiasaun Kristaun Joventude Timor-Leste nia partisipasaun iha eventu tebe bola ne’e hahú ona iha tinan 2012,  tan ne’e labarik sira ne’ebé partisipa iha jogu ne’e, balun foun no balun tuan.

“Ami organiza eventu ne’e komesa 2012, hahú ne’e, la’o mai, ami organiza estudante sira ba joga, estudante balun ba joga ona iha internasional no foin dadaun ne’e mós ekipa na’in rua ida hanesan ne’e tama iha FFTL, entaun labarik sira ne’ebé foun ho idade husi 20 mai kraik, ne’e ami fasilita,” dehan Prezidente Konsellu.

Entretantu, Estudante voluntariu husi Japaun Hana Fukushima hatete, bainhira sira fila ba Jpaun sei buka tan ekipamentus sira seluk kona-bá desportiva tebe bola nian hodi apoia ba labarik sira iha Timor-Leste.

Enkuantu, iha atividade apoiu ekipamentu desportiva ne’e, partisipa mós husi Embaixadór Japaun iha Timor-Leste Tetsuya Kimura, formadór sira, estudante voluntariu husi Japaun no mós labarik husi Asosiasaun Kristaun Joventude sira.