Felisitasaun ne’e Primeiru-Ministru Xanana Gusmão hato’o liu-husi karta ofisiál ho númeru 209/PM-GPM/X1/2024 iha Díli, 7 Novembru 2024.
“Karru Prezidente eleitu Trump, lori Governu no povu Timor-Leste nia naran, aprezenta ha’u-nia sinsera felisitasaun bá ita-nia vitória abranjente iha eleisaun prezidensiais,” Xanana Gusmão hateten liu husi komunikandu ne’ebé Online INDEPEDENTE asesu iha Pájina GPM, Segunda (11/11).
Tuir komunikadu ne’e haktuir, Primeiru-Ministru konsidera vitória eleitorál Trump nian, refleta apoiu no konfiansa ne’ebé povu Amerikanu depozita bá ninia lideransa no polítika bá ninia nasaun.
PM Xanana dehan, Estadus Unidus Amerika ho Timor-Leste iha relasaun amizade ida ne’ebé forte tebes no kooperasaun forte bazeia bá respeitu mútua bá valores, kompromissu no prinsípiu sira demokrátiku.
Nasaun rua servisu hamutuk ona nu’udár parseiru ne’ebé iha kooperasaun ida ne’ebé fó ona kontribuisaun signifikativa bá dezenvolvimentu Timor-Leste nian no envolvimentu internasionál.
Tan ne’e, Xanana Gusmão fiar katak, Trump ninia lideransa sei hametin liu-tán kooperasaun entre nasaun rua, sei promove liu-tán kolaborasaun iha área interesadu sira.
Enkuantu, Governu Timor-Leste iha esperansa bele servisu hamutuk ho Prezidente eleitu no Governu Amerikanu nian atu bele atinje objetivu komún ida no bele hakle’an liu tán relasaun bilaterál.
Xefe Governu hato’o votus susesu bá mandatu Trump nian no votus prósperu bá povu no nasaun EUA.
