Hafoin distribui motorizada hirak ne’e ba Xefe Suku sira, Ministru MAE Tomas do Rosário Cabral, husu ba Xefe Suku sira, atu utiliza motorizada hirak ne’e ho kuidadu no funsiona iha suku laran hodi atende populasaun sira.
Ministru dehan, motorizada sira ne’ebé Xefe Suku sira anterior simu, Governu kria ona rezolusaun ida, atu Xefe Suku sira iha obrigasaun atu muda xapa matrikula estadu nian ba xapa matrikula privadu. Atu nune’e labele difikulta movimentu Xefe Suku sira nian.
“Bainhira Xefe Suku balun uza nafatin ho Xapa Matrikula Governu nian, kuandu Polísia kaer, Administrasaun Munisipal nomós Diresaun Nasionál sei la assume responsabilidade, tanba iha ona orientasaun, motor sira ne’e tenke troka naran”.
"Motor Ofisiál estadu nian mak motor rua ohin (horseik) entrega ne'e, tanba ne'e, husu atu jere sasan estadu nian ho di'ak, hodi atende populasaun iha kraik," dehan Ministru liu husi komunikandu ne'ebé Online INDEPEDENTE Sita iha Pájina MAE, Segunda (11/11).
Entertantu, total motorizadas ne’ebé distribui ba Autoridade Lokal sira iha Munisípiu Dili hamutuk unidade 62, kompostu husi veikulu motorizadas ho marka verza ho total 28 ba Xefe Suku Mane, Veikulu Motorizadas marka Honda Beat total tolu (3) ba Xefe Suku Feto, no veikulu motorizadas marka Honda Fit 31 hodi sai hanesan operasionál ba Suku sira.
Enkuantu, iha tinan-2024, Governu liuhusi Ministériu Administrasaun Estatál (MAE), tau ona osan hodi sosa veikulu motorizadas hamutuk 904, motorizada sira ne’e sosa hodi fó apoiu ba servisu Xefe Suku sira nian, no mós apoiu servisu operasionál kada suku sira.
Motorizada sira ne’e, kompostu husi veikulu motorizadas ho marka Honda Verza hamutuk 447, veikulu motorizadas ho marka Honda Beat total lima (5), no veikulu motorizadas marka Honda Fit total 452 ne’ebé sai hanesan motorizadas operasionál ba suku sira nian.
Veikulu Motorizadas hirak ne’e, iha hotu ona Kapital Dili, kompañia manan na’in hahú transporta ona ba kada Munisípiu, Ataúro inklui RAEOA.
Entretantu, kona-ba periodu garantia, deskreva ona iha kontratu, katak kompañia sei garantia nia periodu hodi bele garantia to’o kilomentru rihun 5 no sei troka Oleo no halo inspesaun ba mákina iha kada 500 kilometru.
Fatin ofisina ne’ebé sei hala’o manutensaun iha kompañia Bandidu Qualidade Corporation Unipessoal Lda, iha Tasi-tolu. Nune’e mós husi parte DNAAS sei prepara sirkular propóriu ida, hodi guia Xefe Suku no Ofisál Administrativu Suku sira, atu utiliza Motorizada sira ne’e iha terenu.
