Timor GAP, Empreza Publiku, ne’ebé hola parte mós iha prosesu negosiasaun hamutuk ho Ministériu Petroleu no Rekursus Minerais, no Autoridade Nasionál Petroleu (ANP), esplika kona-ba prosesu negosiasaun ne’ebé daudauk ne’e la’o.

Prezidente Timor GAP, EP., Rui Maria Alves Soares informa, iha prosesu rua mak daudauk ne’e la’o iha iha negosiasaun ba Greater Sunrise (GS).

Prosesu dahuluk, nia dehan, mak estudu konseitu ne’ebé haree kona-ba opsaun dada kadoras ba Australia ka mai Timor-Leste.

“Estudu ne’e halo husi entidade independente ne’ebé iha tempu badak sei fó rezultadu hodi aprezenta mai iha parseiru projetu mak Woodside, Osaka Gas no Timor GAP, no mós ba Governu Australia no Timor-Leste,” dehan Rui ba jornalista sira iha Hotel City 8, Manleuana, Kinta (07/11).

Rui hein katak iha semana ida ka rua nia laran sei finaliza estudu refere no aprezenta nia rezultadu nune’e parseiru sira bele halo analiza hafoin halo proposta kona-ba konseitu saida mak serve liu atu dezenvolve kampu GS.

“Konseitu ne’e hili produsaun ho kadoras mai Timor-Leste ou kadoras ba Australia, depois halo tiha proposta ida ne’e mak aprezenta ba Governu Australia no Timor-Leste mak hodi deside, karik deside, katak konseitu ida ne’e sira aprova, parseiru sira implementa iha faze tuir mai,” nia esplika.

Prosesu daruak, nia hatutan, mak prosesu negosiasaun enkuardamentu legal.

Tanba, nia esplika, tratadu Tasi Timor ne’ebé uluk eziste muda ba rejime foun, Tratadu Fronteira Maritima, nune’e tenke negosia fila fali dokumentus legal nian ba iha kodigu minerasaun nian no ba kontratu fahe produsaun no mós rejime fiskal kona-ba selu impostu, no fahe reseitas.

“Ne’ebé prosesu rua ne’e lao hotu. Prosesu estudu konseitu ne’e la’o ho prosesu negosiasaun enkuardamentu legal mós lao hela. Ita espera estudu ne’e bele finaliza iha semana rua ka tolu ba oin, nune’e negosiasaun mós bele finaliza. Ita espera fim do ano konklui ona, nune’e ba tinan oin hein de’it ba faze implementasaun,” katak nia.

Iha fatin hanesan, Ministru Petroleu Rekursus Minerais (MPRM), Francisco Monteiro promete atu aselera prosesu negosiasaun ba GS.

“Ita hakarak par aselera par ikus mai ita bele halo desizaun ida hodi lalais ona dezenvolvimentu Greaters Sunrise nian, dada kadoras mai Timor-Leste,” dehan Ministru Francisco.

Nia dehan, prosesu negosiasaun ne’e iha parte balun ninia faze besik to’o nia rohan. Balun hela de’it parte balun mak seidauk.

“Prosesu iha parte balun atu besik to’o nia rohan ona, purezemplu petroleu nian hela de’it ona pontu ida rua ita bele finaliza ona, maibé parte balun sei persiza diskusaun tan uitoan tanba ingresus barak mak iha laran ne’ebá, entaun ita persiza diskusaun nakloke,” nia esplika.

Opozisaun dúvida

Prezidente Bankada Fretilin, Aniceto Longuinos Guteres hatete, prosesu dezevolvimentu Greater Sunrise ne'ebé governu dasia promete iha tempu kampaña seidauk iha loron fisku hodi konkretiza.

"Dezenvolvimentu Greater Sunrise ne’ebe ita-boot (PM) rasik durante iha kampaña politika 2023 temi nu'udar ita-boot nia prioridade ukun, ladauk iha planu no kalendariu ida fiksu atu konkretiza, nune’e laiha serteza atu iha tinan 10 nia laran ita bele hetan ona reseita hodi hasess Timor-Leste husi risku," dehan Aniceto iha ninia intervensaun durante debate OJE 2025, iha PN, Kinta (06/11).

Iha situasaun inserteza hanesaan ne’e, ho tan kampu Bayu Undang ne’ebé sei la hatama tan ona reseitas ba kofre estadu, estadu labele ona evita presipisiu ka rai naruk orsamental.

"Saida mak bele halo mak adia ka prolonga vida útil Fundu Minarai nian hodi fó biban ba estadu atu diversifika ekonomia no hetan fontes alternativa atu sustenta Orsamentu Jeral Estadu.”

Maibé, nia hatutan, prolonga vida útil mós so bele akontese se Governu halo reforma ho opsaun sira, halo reforma atu aumenta reseitas domestika, hola medidas atu reduz despeza publika sira, no aumenta empréstimu.

Biar Governu halo reforma ho opsaun sira ne’e, tuir nia, se tinan-tinan foti osan husi Fundu Minarai no estrutura orsamentu hanesan tinan 2025 nian, ne’ebé gasta osan ba infraestrutura sira ne’ebé laiha kualidade no la garante atu lori retornu, tau osan barak liu ba despesas rekorentes hodi habokur de’it makina estadu, no tetu orsamental sei aumenta tan 7% kada tinan, durante tinan neen, mak invés prolonga nia vida útil, Fundu Minarai sei mohu lais liu, no Timor-Leste sei bankarota iha tinan hitu oin mai.

Hatan ba kestaun ne’e, Primeiru Ministru, Kay Rala Xanana Gusmão hatete, maske problema GS ne’e la fasil maibé governu sei la hakiduk.

"Sei iha hela nafatin enkontru hamutuk ho Austrália ne'ebé hakarak lori ba Darwin no mós ho kompaña sira ne'ebé hakarak aproveita tempu di'ak liu tan lori mós ba (Darwin) maibé komu ita firme, ita dehan ‘lae’, firme kedas iha komisaun rekonsiliasaun ninian to'o agora, ne’eduni ita sei la hakiduk tanba buat ne'e ita nian.”

“Bayu Undang mós iha ita ninian espasu maritimu mais komu antes ita ko'alia kona-ba fronteira maritima dada tiha ona ba Austrália, maibé ida ne'e ha'u akompaña nafatin, haruka nafatin iha negosiasaun, ha'u labele promete katak loos ona mais ha'u bele dehan katak lao ho di'ak," dehan PM Xanana.

PM Xanana informa, nia hasoru-malu ho Primeiru Ministru Australia, Anthony Albanese, iha Melbourne no hasoru-malu mós iha Laos, no koalia ba malu ona katak bainhira atu ba halo vizita ba Australia atu asina ona akordu.

"Ne'e katak se la tuir saida mak Timor-Leste husu ‘sorry, soyry ya’, ne'ebé ita fiar katak iha tinan ida ne'e to'o fim do ano buat ruma bele fó hatene mai ita katak loos duni buat ne'e sei halo," dehan Xefe Governu ne’e.