Traballadór hamutuk 86 ne'e kompostu husi mane na’in 66 no feto na’in 20 ne'ebé atu ba servisu iha Australia sei deskola iha loron 02 Outubro 2023.

Sekretáriu Estadu Formasaun Profisionál no Empregu Interinu Mateus Wilfrido do Santos Tallo hatete, bazeia ba polítika no programa IX Governu Konstituisionál, Governu esforsu maka'as ba asuntu dezenvolvimentu ekonomia, tanba joven ho idade produtivu iha númeru ne'ebé boot maibé oprtunidade ba servisu menus liu.

Tan ne'e SEFOPE servisu maka'as buka nafatin nasaun amigus sira hodi kontinua simu joven sira ba servisu iha rai liur.

“Ami Governu servisu makaas ba ita nia joven sira hodi hetan netik servisu, hodi hadi'a situasaun sosio-ekonómiku iha ita nia rain,” dehan SEFOPE interinu iha Salaun Timor Lodge Komoro, Sesta (29/08).

Nia dehan, Joven sira ba servisu Australia haruka osan mai la’ós ba kofre estadu maibé  ba familia inan-aman sira hadia situasaun ekonomia familia ninian.

“Ha’u husu ba joven sira ne'ebé foin sama ain iha Nasaun Australia katak kultura moris kultura familia nian diferente, tanba Australia nasaun dezenvolvidu iha mundu, tan ne'e tenki respeitu ema nia kultura servisu,” dehan nia.

Iha fatin hanesan, Traballadór Luizinho de Jesus Tilman senti kontenti ho oportunidade bele ba servisu iha rai liur, tanba liu husi oportunidade ne'e bele hadia ekonomia uma laran.

“Hau senti kontenti, tan ne’e ha’u hato’o agradese ba Governu, tanba bele fó ona opotunidade ida ne’e mai ha’u, tan ne’e bainhira ha’u ba servisu hetan osan bele ajuda ekonomia familia no ajuda alin sira eskola,” dehan nia.

Nune’e mós, mehi Luizinho nian ne'ebé iha, bainhira servisu hotu fila-fali mai Timor sei loke fali servisu seluk hodi ajuda joven sira ne’ebé seidauk hetan servisu.

Enkuantu, hanesan joven ida, enkoraja mós maluk joven sira seluk hakribit violensia hodi hola parte iha área formasaun hodi bele hetan oportunidade ba rai-liur atu nune’e fila fali mai bele ajuda ekonomia rai-laran.