Folin fós ne'ebé sa'e makas sai preokupasaun boot ba sosiedade tomak, nune'e liu husi Konsellu Ministru Primeiru Ministru orienta Ministru relevante sira atu servisu hakas an hodi rezolve assuntu ne'e ho lalais.
Ho nune'e, Vise-Primeiru Ministru Ministro Koodernador Asuntu Sosiais, Mariano Asanami Sabino, Vice-Primeiro Ministru Assuntos Economico em ezersisiu, Miguel Manutelu no Ministru Komersiu Industria (MCI) Filipus Nino Pereira, ezekuta orientasaun Xefe Governu nian hodi konvoka enkontru ho kompaña importadór sira hodi diskute kestaun refere.
Ministeriu Komersiu Industria Nino Pereira hatete, iha fulan hirak nia laran problema ne'ebé sai polemika liu-liu folin fós ne'ebé sa'e, medidas hotu governu halo to'o ona iha konkluzaun ida ba normalizasaun presu fós iha Timor.
Ministru dehan, enkontru Konsellu Ministru ne'ebé hala'o iha Palasiu Governu ila loron 29 Setembru 2023, aprova ona dekretu lei ida nudar matadalan ba medidas intervensaun temporariu presu fós.
"Sua exelensia hatun orientasaun prazu loron tolu, ba Ministeriu MKI ho desizaun sira ne'ebé ita haree importante duni atu ita bele sai husi situasaun ida ne'e, tanba ne'e ohin ita enkontru ho Vise-Primeiru Ministru na’in rua ho kompaña importadór ne'ebé iha koperasaun di'ak halo ona enkontru lubuk ida hodi garante katak presu ida ne'e ita sei normaliza, garante mós katak, stock ne'ebé iha bele atende ba ita nia nesesidade konsumu fós iha merkadu nivél Nasionál," dehan nia iha komunikandu ne'ebé Online INDEPENDENTE sita.
Ministru afirma, bainhira Prezidente Repúblika dekreta ona dekretu lei ne’e, mak iha tempu badak nia laran governu sei foti medida hodi asegura presu fós ba teritoriu tomak ho baze kada kilograma $0,50 no fós saku ida ho 25gk ho presu dolar amerikanu $12.
"Ami iha ona konkordansia ho kompaña importador sira hatudu komitmentu boot tebes hodi ita bele delibera to'o retallu sira, ne'ebé aplikasaun ne'e ita sei hahú ho medidas balun ne'ebé ita sei la'o hanesan kontratu ne'ebé ita sei prepara hodi asegura medidas intervensaun halo hodi estabiliza folin fós iha ita nia nasaun," Governante dehan.
Enkuantu, konkordansia ne'ebé iha mak governu sei fó subsidiu $ 5.00 kada fós saku 25kg no sei buka dalan mós apoiu Sentru Lojistiku Nasional (CLN) nian oinsa atu fasilita tula fós sira ba Munisipiu.
Tanba ne'e, sei orienta funsionariu MCI iha Munisipiu sira atu rekolla dadus kompañia sira ne'ebé baibain faan fós, ne'ebe iha loron ida rua tan mai bele implemeta ona subsidiu ne'e para bele normaliza ona folin fós.
