Diretór Nasional Empregu no Exterior (DNEE), João Pereira hateten, normalmente molok atu ba servisu iha Australia ka Súl Korea, traballadór sira sei asina deklarasaun ho SEFOPE. Traballadór na’in 43 ne’ebé iha tempu badak sei aranka ba Australia kompostu husi mane na'in 28 no feto na'in 15.
Nia haktuir, traballadór hirak ne’e sei ba servisu iha Australia ho durasaun tempu fulan 9. Tanba ne’e, husu ba traballadós sira tenke hatudu rejultadu servisu ne’ebé di’ak, kumpri nafatin regras iha ema nia nasaun no labele halai ses husi sistema.
Traballadós sira ne’e husi Munisipiu Dili ema na'in 9, Aileu na'in 5, Ainaro na'in 6, Baucau na'in 3, Bobonaro na'in 3, Covalima na'in 1, Likisa na'in 2, Manufahi na'in 2, Ermera na'in 2, Manatutu na'in 1, Vikeke na'in 3, Lautem na'in 4 no RAEOA na'in 1.
"Ami nafatin promove transparansia no balansu ba ema hotu-hotu hodi bele hetan oportunidade ba servisu iha Australia," dehan João Pereira ba Jornalista sira iha salaun SEFOPE, Kaikoli, (18/10).
Nia husu ba traballadór sira atu servisu kuidadu a'an no tenke atensaun maximu hodi labele kria problema ba sira nia an, nune’e bele hetan osan hodi sustenta nesesidade familia nian.
Iha tinan 2023 traballador Timor oan ba servisu iha Australia hamutuk 4517, no servisu iha fatin New South Wales na'in 353, Queensland na'in 1561, South Australia na'in 300, Tasmania na'in 598, Victoria na'in 1016, Wadtern Australia na'in 474 no Northern Territory na'in 215.
Tuir dadus husi tinan 2012 to'o 2023, Governu liu husi SEFOPE haruka ona traballador Timor oan ba servisu iha Australia hamutuk 12.014, ne’ebé kompostu mane na'in 8475 no feto 3539.
Nia informa, ajensia sira ne'ebé mak rekuta ona traballador sira hamutuk 108 no emprezariu sira hamutuk 270.
Iha fatin hanesan, Sekretariu Estadu Formasaun Profesional no Empregu, Rogerio Araujo Mendonça apresia ba traballador Timor oan na'in 43 hodi ba servisu iha Australia.
SEFOPE husu ba traballador Timor oan sira asina deklarasaun ida ne'e atu bele kumpri regras no regulamentu sira ne'ebe haktuir iha akordu ne'e.
