Nia dehan, dokumentus ne’ebé elejivél hodi asesu ba subsidiu mak tenki iha kartau eleitorál, Bileti Identidade (BI) no atestadu médiku no mós ho deklarasaun sira ne’ebé tuir regras MSSI prepara ona.

 “Ba maluk sira ne’ebé atu hetan subsidiu ne’e tenki iha atestadu médiku, kartaun eleitoral no aumesmu tempu ita mós tenki prepara ho BI atu nune'e ita bele asesu ba iha subsidiu ne’ebé mak mensiona,” dehan nia ba Jornalista INDEPENDENTE iha knar fatin, Kaikoli, (19/10).

Diretór Mateus esplika, ema ne'ebé importante tebes atu ajuda EhD sira atu asesu ba sira nia direitu mak fámilia, tan ne'e husu ba fámilia defisiénsia atu tulun sira hodi bele asesu ba sira nia direitu ne'ebé governu prepara ona.

Nune’e mós, nia dehan, MSSI agora iha ona pontu vokal ba EhD iha Munisipiu sira, nune’e bele ajuda sira ne'ebé hetan problema hodi labele asesu ba sira nia direitu.

Entretantu, Diretór Nasional ne’e akresenta, total ema ho defisiénsia ne’ebé benifisia ba subsidu prestasaun social liu husi INSS, iha teritoriu laran tomak hamutuk 9.558.

Aleinde, benifisiariu Bolsa da Mãe kondisional hamutuk ema na’in 8.800 mak hetan ona sira nia direitu.

Nune’e mós benifisiariu BdM-JF iha na’in 209 iha munsipiu hitu hanesan, hanesan, Ainaro, Kovalima, Likisa, Vikeke, Bobonaro Manatuto no Rejiau Administrativa Espesial Oekusi Ambeno (RAEOA), hamutuk 209, ida ne’e mós hetan hotu sira nia direitu.