Prezidente Interinu KFP, Faustu da Costa Freitas, kongratula diretór jerál foun no husu atu hatudu servisu ne’ebé professional iha nia mandate.

“Kongratulasaun espesial ba emposadu nia esforsu tomak ne'ebé tuir ona konkuru ida ne’e, hein katak ho espiritu motivasaun foun ne'ebé ita bo'ot iha, sei sai servidór ne'ebé di'ak no ezemplar hodi presta servisu ne'ebé ho alta kualidade ba ita nia estadu no povu Timor-Leste,”dehan nia, iha serimonia pose ba DJ foun MPRM, iha salaun Garden Beach, Praia dos Coqueirus, Dili (19/10).

Nia hatutan, KFP manifesta nia prontidaun hodi fó apoiu ba ministeriu sira hotu, iha prosesu rekrutamentu hodi garante imparsialidade no mós evita intervensaun politika hodi assegura administrasaun funsaun públika hodi hari baze ne'ebé forte no permanente.

Iha fatin hanesan, Ministru Petroleu, Rekursus no Minerais, Francisco da Costa Monteiro, kongratula emposadu no husu atu hala'o knar bazeia ba regras Komisaun Funsaun Públika nian no mós knar ne’ebé presiza halo iha ministeriu.

"Diretór jerál ne'e hanesan knar sentral ne'ebé bele akumula diresaun hotu-hotu, hodi bele koordena servisu sira ho objetivu ne'ebé trasa ona iha ministeriu liu husi programa no atividade sira ne'ebé iha”, dehan MPRM.

Entretantu, Diretór Jerál Atual, Frederico dos Santos kompromete, sei buka hatene uluk kargu diresaun sira atu nune'e sira bele servisu hamutuk.

Nia dehan, planu prioridade ne'ebé nia sei halo mak haree uluk projetu dezenvolvimentu tasi mane.

Enkuantu, iha prosesu rekutamentu ne’e kompete husi ema na’in ualu, kompostu husi mane na’in neen no feto na’in rua.

Ho nune’e, Frederico dos Santos mak liu iha konkursu ne’e hodi assume knar nuudar Diretór Jerál, MPRM, ba mandatu tinan lima.