Traballadór Timoroan hirak ne’e kompostu husi feto na’in 51 no mane na’in 131.

Sekretáriu Estadu Formasaun Profisional no Empregu, Rogério Aroújo Mendoça hatete,  iha mandatu IX Governu SEFOPE sei kontribui ba objetivu governu nia mak kriasaun empregu hodi redus númeru dezempregu no pobreza iha Timor-Leste.

“Ohin seremonia ida ne’ebé diak tebes, tanba durante mobilizasaun ne’e, ida ohin mak nia númeru boot tebes, traballadór feto hamutuk 51 ne’ebé ho nia porsentu 30, traballadór sira ne’e sei ba servisu iha área hortikultura no industrian, hospitalidade, Pekuaria,” dehan nia iha Salaun Timor Lodge Komoro, Sesta (22/09).

SEFOPE mós enkoraja traballadór sira atu ba servisu iha Australia labele sai Sistema no kumpre regras no prosedimentu ne’ebé iha.

“imi sei husik hela familia iha TL hodi ba moris iha rai Australia iha ambiente foun no sosiedade foun ne'ebé la hanesan ho TL, presiza imi adapta an iha fatin ne'ebé atu ba,”tenik nia.

Nia dehan, iha tinan 2023, SEFOPE konsege haruka ona traballadór hamutuk 2.821 ne’ebé kompostu husi mane na’in 1.923 no feto 898 ba servisu iha Australia.

Iha fatin hanesan, Reprezentante Embaixadóra Australia iha TL, Caitlin William hatete, governu no povu Australia kontenti tebes bele parseria ho governu TL.

Tanba ne’e, nia dehan, ba futuru hakarak Timoroan ba servisu iha Australia bele aumenta barak liu tan.

“Parabens ba ita boot sira ba maibe agora ita boot sira hanoin de'it saida mak ita boot sira sei halo no aprende iha Australia maibé hanoin mós saida mak ita boot sira sei lori fila fali mai atu kontribui ba iha dezemvolvimentu imi nia nasaun nian,” dehan Caitlin.

Nia dehan, durante prezensa Embaixador nia iha TL nota katak, povu TL nia komitmentu ba nasaun boot tebes atu dezenvolve rai Timor diak liu tan.