Prezidente Tribunál Rekursu, Deolindo dos Santos hateten, Tribunál sei haree membru governu sira nia deklarasaun hafoin maka bele hateten buat ruma kona-ba buat ne’ebé lei ne’e estabelese.

“Kona-ba deklarasaun ne’ebé sira hateten ne’e presiza tempu atu haree didi’ak, tanba lei estabelese nia kritériu iha ne'ebá”, dehan nia, iha Palasiu Prezidensiál, Bairru-Pité, horisehik.

Nia esplika, governante sira iha númeru ne’ebé boot, entaun presiza haree didi’ak katak deklarasaun sira ne’e tuir buat ne’ebé lei ne’e rasik estabelese ka lae, depois maka Tribunál bele hateten buat ruma.

Relatóriu ba riku-soin ba governante sira ne’e lei maka determina, katak bainhira ema ida atu asume pasta nu’udar membru governu iha obrigasaun atu presta deklarasaun kona-ba nia bens iha prazu loron 60 nia laran.