Tanba ne’e, Parlamentu Nasionál (PN) liu husi Konsellu Administrasaun PN deside atu uza forsa hodi rekolla hotu karreta Prado PN nian, ne’ebé eis-deputadu sira kontinua asegura hela iha uma.

Presidente PN Arão Noe de Jesus hatete, seidauk iha desizaun sosa karreta foun ba deputadu sira, maibé desizaun finál ne’ebé Konsellu Administrasaun PN atu rekolla karreta tuan ne’ebé eis-deputadu sira uza maibé seidauk entrega.

Konsellu Administrasaun PN manda ona karta dala tolu ba eis-deputadu sira atu mai hatama karreta, ne’e duni iha karta datoluk ne’e kontinua la entrega maka sei foti asaun konkretu.

“Karik eis-deputadu sira ne’e mak kontinua la mai entrega nafatin, iha dalan rua ne’ebé ami sei halo. Liu husi prosesu judisiál no sei husu ba Polisia atu foti asaun”, dehan Arão, iha Uma Fukun PN, horisehik.

Entretantu, rejistradu iha Diresaun Nasionál Transporte no Terrestre (DNTT) karreta Prado PN ne’ebé muda ona xapa matríkula Estadu nian ba privadu hamutuk 53.

Maibé, hataan ba ida ne’e, Prezidente PN dehan, maski nune’e sein kontinua aviza ba eis-deputadu sira ne’e atu entrega hotu karreta hirak ne’e.

Desizaun ne’ebé halo ne’e kontinuidade husi III no IV lejizlatura nian ne’ebé deside kansela ona prosesu leilaun, tanba ne’e la halo ona desizaun foun.

Ne’e dui, V lejizlatura halo ona desizaun atu dada fila karreta tuan sira hodi entrega ba deputadu sira atu uza halo servisu.

“Karik sé mak sente prejudikadu ho desizaun ne’e bele lori ba Tribunál atu bele deside sé mak sala. Se Parlamentu Nasionál mak sala karreta ne’e bele hela ona ba sira. Se sira sala tenke kumpre hodi entrega”, dehan nia.

Arão hatete, iha OJE 2018 nian PN la tau osan atu sosa karreta foun tanba problema iha oin seidauk rezolve hotu, maibé kuandu karreta sira ne’e rekolla hotu entrega ona ba deputadu uza hodi hala’o servisu.

Iha OJE 2019 dalan ba iha ne'ebá sosa karreta foun, Konsellu Administrasaun sei tetu hodi tau osan, maibé rezolve uluk problema agora ne’e nian, hafoin iha futuru bele haree fali asuntu ne’e.