Xefe Governu louva tebes ba deputadu opozisaun sira nia kolaborasaun iha durante debate OJE 2018 hahú hosi jeneralidade, espesialidade to’o finál globál.
“Maski ita iha hanoin no ideolojia polítika ne’ebé la hanesan, maibé hotu-hotu kontinua haka'as-aan atu halo ita-nia rai doben Timor-Leste sai país ida justu, inkluzivu, moris-di’ak no dezenvolvidu liután”, dehan PM Taur.
Tuir nia, maski dúvida barabarak ne’ebé hato’o ona kona-ba kapasidade ezekusaun nian, tanba haree prazu tempu nian ne’ebé badak tebes, maibé nu’udar Xefe Governu repete fila-fali determinasaun ne’ebé firme no metin kona-ba esforsu atu implementa orsamentu ne’e, ho dalan ne’ebé kuidadu, responsavel, efikás no efisiente, tuir prátika hirak ne’ebé di’ak liu kona-ba transparénsia públika
Governu hakarak mobiliza apoiu husi setór oioin husi ekonomia no sosiedade, atu nune’e bele alkansa objetivu jerál husi OJE 2018 nian, ne’ebé ho liafuan badak dehan atu halo kondisaun moris sidadaun sira-nian sai di’ak liután.
Tanba ne’e, Governu iha kometimentu sei asesu no prestasaun servisu báziku sira (edukasaun, saúde, integrasaun sosiál, bee no saneamentu, eletrisidade, infraestrutura no meiu ambiente), ne’ebé di’ak liu, ne’ebé bele kontribui ba objetivu boot nasionál atu hasai TL husi grupu nasaun sira ho rendimentu baixu, hodi koloka fali iha grupu rendimentu médiu-aas sira nian.
Governu Labele Haluha Povu
OJE 2018 hetan ona aprovasaun iha PN no hein Prezidente Repúblika promulga, tanba ne’e Governu keta haluha povu sira iha área rurál ne’ebé halerik hela ba dezenvolvimentu.
Presidente Bankada Partidu Unidade Dezenvolvimentu Demokrátiku (PUDD), António de Sá Benevides hatete, iha kampaña eleitorál mai to’o iha diskusaun OJE ne’e sempre lori povu ki'ik sira nia naran hodi konvense malu to’o hetan objetivu polítika.
Iha debate sempre temi povu ki'ik sira, tanba ne’e membru governu sira ne’ebé atu ezekuta tenke asume responsabilidade ho di'ak, nune’e povu ki'ik sira hetan duni benefísiu husi osan ne’e rasik.
“Ba ministru sira ne’ebé nia-isin ki'ik maibé derrepente boot keta haluha povu, ba ministru sira ne’ebé isin boot nanis maibé derrepente tuun tanba loron kalan hanoin mak sura osan, Primeiru Ministru tenke haree didi'ak” dehan António.
Iha fatin hanesan, Vise-Prezidente Bankada PLP, Francisco Vasconcelos rekomenda ba governu OJE 2018 aprova ona, tanba hetan apoiu husi deputadu sira iha PN atu responde nesesidade povu nian.
Rekomendasaun simples ne’ebé PLP fó ba governu atu jere orsamentu ne’e ho responsabilidade no kuidadu atu fó benefísiu ba povu, evita mal-gastu, evita mós halo adjudikasaun direita.
“Ita labele viola regra aprovizionamentu nian, ita atu sai jestór di'ak tenke hatudu komportamentu la'ós halo retórika polítika de’it”, dehan nia.
Tenke hatudu komportamentu ne’ebé di'ak ba povu halo atendimentu ne’ebé mai husi fuan ho umilde no kumpre regra hodi rona mós ema seluk nia konsellu, ne’e mak fatór importante ba lider sira atu halo.
