“Depois de analiza pedidu fiskalizasaun abstrata konstitusionalidade ne’ebe Deputadu 23 hosi Bankada rua hatama iha fulan Dezembru liu ba, Tribunal Rekrusu deklara katak lei numeru 20/2023 loron 12 Novembru, iha artigu 6 no artigu 7 aliña 1, 4 no 5, ne’ebé koalia kona-ba inisiativa atu fó indultu bele mai husi Prezidente Repúblika atu fó indultu ne’e, inkonstitusionál tanba viola artigu 69 no 85 aliña-i no artigu-119 Konstituisaun Repúblika Demokratika Timor-Leste tanba kontra prinsipiu separasaun poderes no la’ós Prezidente Repúblika nia kompentesia ne’ebé estipula iha artigu 85, liu-liu kona-ba rona uluk Governu molok fó Indultu,” Dehan Primeira Vise Xefe-Bankada FRETILIN, Maria Angelica Rangel, liu husi konferrénsia Imprensa ne’ebé hala’o iha Bankada FRETILIN, Tersa (20/02).
Nia hatutan, Pedidu fiskalizasaun abstratu ne’e, Deputadu Bankada FRETILIN no PLP hatama tanba inisiativa lei ne’ebé aprezenta husi Bankada CNRT no hetan apoiu husi Bankada PD iha Parlamentu Nasional ne’e viola konstituisaun tanba hasai tiha kritériu sira ne’ebé estabelese atu hetan indultu no ka komutasaun pena.
"Desizaun Tribunal Rekrusu ne’e, hatudu vitória ida ba Povu no Estadu Timor-Leste hodi trava intensaun aat hosi Ukun Nain sira balu ne’ebé fó perigu ba Estadu Timor-Leste no sistema judisiariu Timor-Leste nian, no buka atu altera Lei hodi bele responde ba sira nia interese pesoal de’it", katak nia.
Iha fatin hanesan, Xefe Bankada PLP, Maria Angelina Sarmento, hateten, bankada rua hato'o petisaun ba TR tanba depois lei ne’e tama vigor, Prezidente Repúblika avansa kedas fo indultu ba Emilia Pires no Mandalena Hanjam, ne’ebé lei fó dalan.
“Tanba iha interdependénsia ne’e mak iha konstituisaun hateten dehan, Ouvido o Governo, katak Prezidente labele hola de’it desizaun sein rona governu, no lei ida fóun ne’e la dehan ida ne’e,” dehan nia.
Enkuantu, lei ne’e hetan aprovasaun no Prezidente Repúbliku mós fó kedas indultu ba Emilia Pires no Madalena hanja miha tinan kotuk.