Husi total orsamentu ne’ebé aloka ba Ministériu Transporte no Komunikasaun (MTK) fahe ba saláriu vensimentu tokon $4.659.105, beins servisu tokon $6.336.53, transferesia públika tokon $1.811.500, kapitál menor rihun $250, no kapitál dezenvolvimentu rihun $296.870.
Molok aprovasaun orsamentu ba MTK, iha proposta husi deputadu bankada FRETILIN, Dario Madeira, Maria Anabela Savio, no Antoninho Bianco, hodi hatuun osan iha programa funsionamentu dezenvolvimentu institusional.
Iha proposta ho númeru 63 ne’e, propoin atu hasai rihun $239.826 husi total osan tokon $5.407.799, ho nune’e hela tokon $5.167.973.
Razaun husi proponente sira mak atu redus viajen estranjeiru husi MTK, tanba iha tinan 2024 aloka orsamentu ho total rihun $165.731 ba viajen estranjeiru, maibé la hatene ninia rezultadu to’o iha ne’ebé.
Ba tinan 2025, proponete sira hatete, MTK propoin orsamentu ba atividades hanesan ho montante rihun $439.826. Signifika iha aumentus husi orsamentu 2024.
“Aumenta ne'e atu halo tan viajen ba ne'ebé, ema na'in hira, ho objetivu viajen saida?. Ami kaer metin Primeiru Ministru nia resposta kona-ba viajen ne'ebé mak hato'o husi maluk Deputadu balun, ne'ebé Primeiru Ministru responde katak ‘ami sei evita no haree see-see de'it mak bele halo viajen.”
“Haree ba aumentu ne'ebé aas tebes ne'e duni ami propoin atu aloka de'it orsamentu ba tinan 2025 ho Valór $250 mill de'it, nune'e hamenus $189.826 mill dólares husi $439.826 mill," katak nia.
Ba kestaun ne’e, Ministru Transporte Komunikasaun, Miguel Marques Manetelu hatan, laiha fatin ba proposta númeru 63 hodi hamenus osan viajen Ministériu nian.
Tanba, nia dehan, total osan beins serbisu iha Gabinete Ministru mak rihun $439,826 no osan ba viajen estranjeiru ne'e iha de'it rihun $192.200.
“Hasai $189 mill kala osan viajen ne'e hela osan $2 mill ida. Tanba ne'e mak ha'u hanoin katak proposta ne'e laiha fatin par aseita tanba osan viajen ne'e kuandu ita tama ba beins serbisu ida $439 mill, ne'e iha de'it $192.200 mill dólar sira ne'e karik," Ministru fó razaun.
Entretantu, iha prosesu votasaun ba proposta númeru 63 ne’e, deputadu na’in 20 vota a favor, na’in 37 vota kontra, no abstensaun neen (6). Ho nune’e, proposta ne’e la pasa.
Enkuantu, iha votasaun ba orsamentu MTK pasa ho votus a favor 42, kontra 18 no abstensaun tolu (3).
