Tanba Timor-Leste tama iha risku aas sírkulu ahi ‘Ring of Fire’, vulneravel tebes ba dezastre boot sira hanesan rai-nakdoko, rai-halai no inundasaun lalais.
Nune’e, haforsa lojístika emerjénsia no promove kolaborasaun entre parte interasada sira importante tebes atu hamenus impaktu husi dezastre hirak-ne'e.
Tanba ne’e, atu hatán ba ida-ne'e, Autoridade Protesaun Sivil (APC), ho apoiu husi Programa Ai-han Mundiál (WFP), hala'o Sorumutu ba Preparasaun Lojístika Umanitária Inísiu no ofisialmente lansa Projetu Preparasaun Bazeia ba Terenu iha Dili.
Tuir Komunikadu ne'ebe Online INDEPENDENTE asesu iha pajina WFP, hatete, sorumutu ne'e ho objetivu atu hadi’a jestaun dezastre liu husi introdús polítika no aprosimasaun governu nian, fornese atualizasaun kona-ba mudansa estruturál sira ne'ebé foin iha no esplora dezenvolvimentu globál sira iha preparasaun lojístika nian hodi hametin prontidaun nasionál.
“Sorumutu dahuluk ida ne'e subliña importánsia husi preparasaun ba efisiénsia no efikásia husi programa umanitáriu sira. Esforsu husi koordenasaun sira ne’e krusiál tebes atu garante resposta ida ho kualidade diak, tanba preparasaun ne’e fo dalan mai ami, nu’udar autór ba servisu emerjénsia sira, hodi fo impaktu pozitivu ba rezultadu resposta iha futuru”, dehan Sekretáriu Estadu Protesaun Sivil, Domingos Mariano Reis, ambitu iha abertura eventu ne’e (14/11/2024).
Iha komunikadu ne’e hatutan, Sorumutu loron rua, ne’ebé diriji ba parte interesada prinsipál sira, inklui autór sira hosi Governu, ONU, ONG no setór privadu, hakarak mós atu enkoraja kolaborasaun liu husi diskusaun, fahe koñesimentu no estabelesimentu mekanizmu Koordenasaun Lojístika ne’ebé lidera iha nivel nasionál hodi hadi’a lojístika umanitária.
“Autoridade Protesaun Sivil no WFP servisu hamutuk hodi harii baze ba sistema lojístika ida ne’ebé forte no funsional, ne’ebé bele responde ho efetivu ba dezastre sira. Esforsu hamutuk ho parte interesada sira oferese oportunidade boot liu atu salva vida liu hosi lojístika ne'ebé bazeia ba dadus, tempu no efisiente, koordenasaun konfiavel no jestaun informasaun ne'ebé efetivu,” tenik Amin Said, Enkaregadu Diretór WFP. Inisiativa ne’e hetan apoiu husi Ekipa Agrupamentu Lojístika globál ne’ebé lidera husi WFP no finansia husi Servisu Asuntu Umanitáriu USAID nian, Diresaun Jerál ba Protesaun Sivil Europeia no Operasaun Asisténsia Umanitária, no Servisu Federal Negósiu Estranjeiru Alemaña nian.
