Tuir Alkatiri, rekonsiliasaun importante ne’ebé tenke halo daudauk mak rekonsiliasaun entre lider sira iha rai laran.

“Ha'u ko'alia ona rekonsialiasaun, di'ak liu ita rekonsilia ba malu uluk tiha lai, ema mós lakohi mai iha ne'e (se) ita la rekonsilia ba malu. Ha'u ho Prezidente Repúblika hasoru malu iha Santa Kruz ami la ko'alia ba malu, hases aan, nia ne'e uluk ba Maputo nia ba hela ha'u-nia uma, ha'u ba nia fatin Austrália ha'u mós hela iha nia uma, agora ami la ko'alia ba malu.”

“Xanana mós uluk ami na'in rua ne'e amigu boot tebes, agora la ko'alia ba malu. Agora ba bolu ema seluk mak mai. Timor-oan sira ne'ebé sira-nia vida la'o hela iha ne'eba (Indonezia), sira tuur hakmatek, sira lakohi mai atu tama tan problema ita nian,” dehan Alkatiri bainhira partisipa iha seminariu nasional ho tema “Oinsa aplika prinsipiu no valores luta nian hodi hakotu kiak no hatuur justisa sosial’ iha salaun Laline, Komisaun Nasionál Eleisaun, Sesta (15/11).

Kona-ba rekonsiliasaun ho Indonezia, Alkatiri dehan, iha pontu rua ne’ebé importante.

Dahuluk mak rekonsiliasaun entre povu Timor-Leste ho povu Indonezia, no daruak mak relasaun entre estadu Timor-Leste ho estadu Indonezia.

“Rua ne'e ida labele faila, se ida faila sala ona,” dehan nia.

“Tanba ne'e balun husu ha'u ‘Prabowo atu mai vizita Timor, entaun nia la'o Prezidente Indonézia?’ Sim, Prezidente, nia atu mai vizita Timor, imi atu halo saida? Ne'e relasaun ita nian, agora ita la rekoñese? Labele hanoin emosionál, rasionál uitoan,”, dehan Alkatiri.

Kona-ba Timor-oan sira ne’ebé daudauk ne’e hela iha Indonezia, tuir eis Primeiru Ministru governu dahhuluk ne’e, Timor-oan sira ne’e iha direitu atu fila fali mai Timor-Leste.

"Timoroan iha Indonézia iha direitu fila mai rai ne'e tanba sira Timor-oan. Balun dehan sira Indonézia ona, ne'e sala. Indonézia mak la atinze dupla nasionalidade, mais ita iha Konstitusaun ho lei nasionalidade konseitu rua, ita labele nega, sira iha direitu.”

Maske nune’e, Sekjer Fretilin ne’e esplika, Timor-oan sira tanba prosesu akontese iha tinan 1999 halo sira ba hela iha Indonézia, nune'e tenke rezolve mós.

“Mais la'ós ba iha ne'ebá atu buka votus. Maibé, ba iha ne'ebá atu ko'alia, fó garantia halo nusa, ema hakarak fila mak fila, la'ós ba lulun ema sira ne'e hotu. Sira gosta ka la'e, ka sira hela iha Indonézia de'it ona mak sira hakarak iha liberdade atu bele ba vizita família depois mak fila, ne'e kultura.”

"Ha'u dehan ona ba sira ‘imi ba atu rezolve liu husi uma-lisan idaidak ninian’ ne'e par sira bainhira mai ne'e sira tama mai uma-lisan kuadradu, loke biti boot ka biti kiik, tuur hamutuk. Sira mós lakohi mai atu hetan problema, sira mai atu buka pas," dehan nia.

Molok ne’e, iha 5 to’o 11 Novembru 2024, Prezidente Repúblika, José Ramos Horta, hala’o vizita ba Kupang, Nusa Tenggara Timur-Indonezia.

Iha vizita ne’e, Xefe Estadu hasoru-malu ho Timor-oan sira iha Kupang, inklui mós eis lider grupu milisia, Eurico Guterres.

PR Horta dehan, nia ba Kupang hodi pasa ferias ho Timor-oan sira iha ne’ebá no konvida sira konvivu jantar.

"Ha'u hasoru mós Timor-oan seluk, Komandante boot iha Kupang, ema Maliana. Hasoru Timor-oan seluk sira iha TNI. Ha'u ba sira mai kumprimenta, sira hamutuk ho TNI, sira sidadaun Indonézia. Sira ne'e mós ha'u ko'alia sira kontente loos haree ha'u ba Kupang," dehna PR Horta iha Santa Kruz, Dili, Tersa (12/11).

Horta dehan, nia kontinua esforsu atu taka duni prosesu 1999 nian. Tanba prosesu ne’e labele fó de’it responsabilidade ba parte ida.

"Ha'u bele hatete de'it, ha'u kontinua esforsu atu ita taka duni prosesu 1999 ne'e. Labele hanoin de'it 1999 ne'e mak responsabilidade," dehan PR Horta.

Tanba, nia dehan, durante tempu funu nian, iha Timor-oan lubuk ida mak mate iha Fretilin nia liman.

“Husu ba família sira Serjentu Aquilis, Serjento Silva… husu took ba Timor-oan lubuk ida ne'ebé sei moris, sira mai hasoru ha'u. Uluk Fretilin bolu sira traidór, afinál sira traidór ka la'e? buat sira ne'e hotu.”

"Ne’eduni ha'u hatete, di'ak liu ita taka de'it prosesu sira ne'e, 100% maun boot Xanana konkorda, sempre koordena ho maun boot Xanana, agora hein de'it momentu ida atu halo prosesu," hatete nia.

Kona-ba nia konvida Eurico Guterres mai partisipa iha loron 28 Novembru, Xefe Estadu  dehan, seidauk halo konvite.

Liga ba krime grave, Horta dehan, ne’e politika estadu nian, nune’e husik nia ho governu mak haree, laos elementu ida ka rua mak deside.

Kona-ba líder nasionál iha nasaun seidauk hamutuk, PR Horta hatete, see mak hatete laiha, klaru Fretilin apoia ida ne'e desde uluk kedas, desde 1999, 2000 Fretilin uluk apoiu kedas ida ne'e, maun Xanana.

"Ha'u hanoin la'ós líder sira la hamutuk, se la hamutuk ba ideia ida ne'e rekonsialiasaun relasaun Indonézia mós la la'o ba oin. Relasaun Indonézia la'o ba oin tanba ita halo rekonsialiasaun Timoroan sira ho Indonézia," afirma PR Horta.

Alende ne'e mós Prezidente Repúblika konvida Prezidente Repúblika Indonézia Prabowo Subianto mai Timor-Leste maibé ne'e seidauk iha konfirmasaun tanba nia halo viajen ba Rúsia, Xina, Amérika bainhira nia fila mak, nia konfirma bainhira mak mai.

"Ha'u konvida mai loron 28 Novembru, maibé depende ba nia ajenda, jenerál seluk mós konvida tiha ona atu mai," hakotu nia.

Entretantu, iha fatin ketak Sekretáriu Jerál Partidu Fretilin, Marí Bim Amude Alkatiri hatete, iha rai laran, uluk luta hamutuk laiha rekonsialiasaun agora ba buka fali rekonsialiasaun.

"Ha'u atu hamnasa fali ita iha rai laran, ita uluk luta hamutuk laiha rekonsialiasaun agora ita ba buka fali rekonsialiasaun, sira mós la fiar, sira hatete ida ne'e imi iha Timor-Leste la ko'alia ba malu, imi mai bolu fali ami ba halo tan problema iha ne'eba," haktuir Alkatiri.

Nia hatutan, foin lalais Prezidente Repúblika ba to'o iha Kupang sa'e mikrolet buat sira ne'e ida-idak ninia prátika, Xefe Estadu ne'e Xefe Estadu reprezenta estadu, antes konvida la konvida tenke konsulta ema bara-barak rai ne'e lá'os o nian mesak.