Orsamentu ne'ebé aloka Ministériu Saúde katégoria lima hamutuk tokon $73.931, ne'ebé fahe ba saláriu vesimentu tokon US$ 37, bens servisu tokon US$ 13, fundu transferensia públika tokon US$ 20 no kapitál dezenvolvimentu tokon US$ 1, inklui kapitál menor tokon US$ 1.

Deputada Bankada FRETILIN, Nurima Ribeiro Alkatiri hatete, Bankada FRETILIN vota abstensaun ne'e la'ós vota kontra osan ne'ebé aloka ba setór importante ba populasaun sira, maibe tenke iha jestaun ne'ebé di'ak atu halo tuir duni programa saúde nian.

"Ami vota abstensaun katak ami la vota kontra osan ne'ebé mak importante iha setór save ba  Populasaun, maibé ami ezije nafatin katak Jestaun ba osan ida ne'e, Jestaun ho polítika no Problema saúde tenke ho los, tenke tau ema ho kompetenti no ema ne'ebé iha vontade duni atu servisu saúde ba povo nian," dehan nia, iha plenaria PN, Sesta (15/11).

Nia dehan, labele fali para ida-idak, buka de'it retorika no buka de'it ko’alia furak- furak rebo los no teoria kapás los maibé iha prátika kontrariu.

"Ami husu Ministra Saúde iha ami nia intervensaun sira, temi Ministra maibé em vez Ministra mak hatan, señór Vise -Primeiru Ministru mak hatan mezmu ke durante audénsia Vise -Primeiru Ministru la Partisipa," nia dehan.

Iha fatin hanesan, Ministra Saúde, Elia dos Reis Amaral, agradese ba Parlamentu Nasionál ne'ebé aprova ona orsamentu husi Ministreriu Saúde ba oin sei hein hadi’a saida mak durante ne'e publiku kestiona.

"Agradese ba Parlamentu Nasionál, tanba aprova ona orsamentu husi Ministeriu Saúde, ita hein ba oin para hadi’a servisu ne'ebé durante ne'e públiku kestiona pertente, tebe-tebes ba iha jestaun sira maibé ita presiza hare'e," dehan Elia.

Nia dehan, iha transferensia públika ministériu hetan tokon US$ 20, ida-ne'e atu kontinua selu pasiente sia ne'ebé halo tratamentu ba iha rai liu no selu mós brigada médiku Cubano sira.

Kestiona Jestaun

Bankada oposisau husi FRETILIN no PLP nafatin kestiona Jestaun husi Ministériu Saúde mak resultado nafatin aimoruk la iha no Post saúde taka iha fatin-fatin.

Deputada Bankada FRETILIN, Florentino Ximenes da Costa ( Sinarai) hatete, konkorda ho hanoin iha sira ne'ebé Primeiru Ministru hato'o iha debate jenerálidade katak problema saúde la'os de'it atu aumenta osan maibé presiza hadi’a Jestaun.

"Problema iha saúde la'ós de'it atu aumenta osan,maibé Jestaun presiza hadi’a no kurize ha'u nia pergunta mak ne'e, Jestaun ne'ebé mak señór Primeiru Ministru ho señóra Ministra atu hadi’a iha área saúde nian, no resultado mak falta ai-moruk," dehan nia.

Nia hatutan, tebe sai profisional saúde, sira ne'ebé servisu tinan barak no hatama fali ema laiha esperiénsia, ema mate númeru aumenta ba beibeik, ema tara an iha  ospitál, postu saúde taka iha fatin-fatin.

"Iha diskursu toma de posse señór Primeiru Ministru dehan katak 120 dias, sei rezolve problema iha ospitál no fasilidade saúde sira, maibé tanbasá agora realidade ai-moruk sira ne'e falta nafatin ita-boot nia ukun tinan ida fulan haat maibé atu resolve aimoruk ne'e gasta ona tokon US$ 18,2," nia dehan.

Nia afirma, hahú husi orsamentu retifikativu tokon US$ 6, orsamentu normál 2024 tokon US$ 4.2 no foin iha tinan klara aumenta tan osan.

"Husu fundus kontesiensia sadanga-sadanga tokon US$ 8, ne'e ita soma hamutuk, tokon US$ 18.2 ona, pela primeira vez osan hodi sosá aimoruk bo'ot liu iha tinan ne'e, ita nia istória mak ida-ne'e duni señór Primeiru Ministru maibé tanba sá iha ospitál kontínua haruka ema ba sosá aimoruk iha apotik no klínikal sira, señór Primeiru Ministru,"nia afirma.

Nia haktuir, Primeiru Ministru hatene di'ak situasaun emerjensia tebes armazen SAMES mamuk wainhira nonu governu tama ba ukun maibé tanba sá, foti projeitu sosá aimoruk ne'e ho valór $6 Milloes fo ba kompañia ida ne'ebé nia servisu durante halo kontrusaun de'it,

"Nunka iha nia vida sosá aimoruk dala ida mós laiha, derepente hetan kontratu ida bo'ot tebes ho valór $6 Milloes, to'o ikus mai buka ai moruk tun sa'e no la hetan aimoruk, fo impaku tebes ba ema mate iha ospitál no iha fatin tratamentu sira ema hotu bingu mak ida-ne'e to'o agora señór Primeiru Ministru ho Ministra Saúde fo sala ba governu anterio kona ba falta ai-moru,"nia haktuir.

Iha fatin hanesan deputada husi Bankada PLP Maria Angelica Sarmento hatete, hakarak hato'o de'it perguntas báziku ida ne'ebé iha nia artikulasaun ba mandatu Konstitusaun iha artigu 57, númeru 2.

"Ha'u hakara halo de'it perguntas báziku ida, to'o iha ne'ebé ita nia artikulasaun ba mandatu Konstitusaun artigo 57 númeru 2, ne'ebé dehan o estadu promove a criasao de um servisu nasionál de saúde  gerál, i na medidas da sua posibiildade gratuito, no mesmu termu da lei, situasaun saúde ne'e sai pekupasaun  bo'ot,  bo'ot liu mak iha atendimentu ospitál Dili no dividas iha rai li'ur"dehan Deputada Angélica Sarmento.

Nia dehan ba atendimentu iha ospitál iha Dili ema hotu hatene katak falta ai-moruk, no mós halo mudansa ba pessoais saúde sira ne'ebé iha esperiénsia.

"Tanba ida ne'e ligadu ho ema nia vida desizaun sira, ne'ebé mak ita foti kona ba mudansa pessoál saúde sira ne'e tenke kuidado,  tinan ida ho balun ona ita haree hotu katak Ministériu Saúde liu-liu líderasan señór Ministra, la iha vontade atu halo intervensaun ho karakter propriedade  ho ezijénsia, ba situasaun iha Hospitál Nasionál Guido Valadares (HNGV),"nia dehan.

Nia afirma Maibé sira  haree  Ministra saúde fo liu prioridade ba ajenda Ajénsia internasionál sira nian hodi promove sira nia interese.

"Ita la hatene katak sira hare'e,ita nia frazilidade iha setór saúde, sira uza ita hodi halo promove advokasia ba Ajénsia sira ne'ebé mak Ajénsia internasionál sira halo hela. Maibé sira rasik la kontribui hamenus no ka diminui  problema sira ne'ebé mak ita hasoru, iha situasaun sira ne'ebé mak iha setór saúde,Tinan ida ne'e, "nia afirma.

Nia informa iha tinan kotuk sira mós iha proposta ida, presiza reforsa iha setór saúde maibé Ministra saúde rasik deklara osan sufisiente hela.

"Ami konsente katak saúde setór ne'ebé propriedade, ita presiza iha reforsu, entaun ami mós halo proposta ida atu fo aumenta ba ita bo'ot nia osan ba saúde, ho por volta $500 Mill dolares, maibé iha sala  Plenaria ita bo'ot  rasik deklara katak ha'u nia osan ne'e sufisiente tebes-tebes,"nia informa.

Nia hatutan realidade hatudu to'o iha dala klara Ministra Saúde  husu aumenta $8.5 Milloes hodi sosá tan aimoruk.

"Hatudu katak ami iha  vontade hakarak ajuda ita bo'ot, ita bo'ot la simu, iha dala klara ita bo'ot husu reforsu dontasaun jerál estadu $8.5 Milloes, ne'ebé komprova iha trimestral, segundo trimestre ne'ebé governu hato'o mai,"nia hatutan.

Hatan ba Asunto ne'e Mak Vise-Primeiru Ministru, Ministru Kordenadór Asunto Sosiais no Ministru Dezevolvimentu Habitatasaun Rurál Mariano Assanami Sabino hatete setór saúde iha problema tanba iha politizasaun iha saúde iha professional partidu idak-idak nian iha ne'ebá. Tanba ne'e mak ha'u para sira ida-idak tenke kaer metin juramentu.

"Ita hakarak ko'alia ho sira para sira tenke ka'er ho sira nia juramentu, juramentu nu'udár mediku, tanba ne'e mak ita tenke hadi’a, reforma ne'e ita tenke halo duni para ita hadi’a ba estadu ba nasaun la'ós halo fali politizasaun lalika marka ema ne'ebe servisu iha saúde,"dehan Vise- Primeiru Ministru.

Nia dehan ema ne'ebe servisu iha edukasaun, ida-ne'e maka tenke halo duni,

"Kona-bá problema ai-moruk persija dijitaliza. Ai-moruk saida mak presiza hadi'a, ai-moruk saida presiza sosa, nune'e evita sunu ai-moruk kada tinan no mós presiza iha padraun estadu ba klínika sira,"nia dehan.

Problema Saude sei Barak

Sosiedade Sivil Forum Organizasaun Naun Governamental Timor-Leste (FONGTIL) konsidera Ministeriu Saude  (MS) ba problema saude iha rai laran seidauk atende ho diak.

Diretór Exekutivu FONGTIL Valenten da Costa hateten, problema setor saude sai hanesan prioriedade maibé Ministeriu Saude seidauk atende diak-diak ba problema sira ne'e, nune'e ONGTIL ho nia membru sira kontinua hare'e kada tinan liu husi auditorial sosial.

"Ho situasaun balun deskobre ona katak iha sistema saude iha Timor-Leste seidauk diak, tanbá ita iha limitasaun lubuk ne'ebé kontinua hasoru ho nia melloramentu sira ne'e ladun lalais," dehan nia.

Nia hatutan, funsionamentu iha postu saude ho limitasaun ekipamentus ai-moruk laiha no númeru mortunidade kontinua aumenta hatudu katak buat ruma iha sistema saude la'o hakdasak.

Tanbá ne'e, governu tenke mellora hodi haforsa diak liu tan iha sistema saude mak sai problema iha Postu saude kada munisipiu, ami rekomenda hodi hato'o ba governu liu husi Ministeriu saude tenke eleva nia orsamentu.

"Nune'e bele aloka ba setor saude liu-liu saude primaria sira ne'ebe afeita maka'as ba ita nia inan no labarik sira, tanbá ai-moruk laiha kontinua akontese hatudu katak orsamentu tinan 2025 nia tenke aumenta," Nia informa

Ho grasa adeus tinan oin, aumenta orsamentu montante $33 milloens hodi aloka ba setor saude katak nia orsamentu montante aumenta no hanoin ida diak.

FONGTIL husu nafatin oinsá atu bele aloka orsamentu sira ne'e tenke iha estratejiaku, atu nune'e bele lori mudansa ruma.

Tanbá orsamentu balun nafatin apoiu ba tratamentu saude iha rai liur, ba ami hanoin naton ona no ita eleva grau husi hospital sira hodi kompleta ekipamentus sira ba kada postu saude iha munisipiu sira.

Nune'e fo formasaun avansadu ba mediku sira hodi bele halo tratamentu ne'ebé diak iha rai laran no liu-liu daet kangkruk, moras ran midar no intensaun alta no mos moras fuan.

"Ha'u hanoin moras sira ne'ebe grave liu tenke halo tratamentu iha Timor-Leste, tanbá ita nia mediku ho fasilidade lubuk ida iha ne'e hahú halo ona tanbá sa seidauk realiza," Nia husu

Duke tau osan bei-beik ba tratamentu iha rai liur maibé ema uitoan mak asesu, ho nia prosesu sira ne'e konflokadu tanbá balun lakon vida.

FONGTIL rekomenda ba governu liu husi Ministeriu saude   diak liu hodi estabelese sentru balun iha Timor-Leste atu nune'e hare'e ema sira ne'ebé moras grave bele fasil asesu diak liu halo tratamentu iha rai laran.

Iha fatin hanesan Vice Diretór HAK Antonino de Lima hateten, Kona-ba Orsamentu Jeral Estadu (OJE) tinan 2025 nia ba Ministeriu Saude iha Parlamentu Nasional aprova ona orsamentu ba setor saud nian.

Maibé importante mak orsamentu ne'ebé aprova ona iha Parlamentu Nasional governu liu husi Ministeriu Saude implementa liu-liu atendementu publiku no postu saude sira kada munisipiu.

Tanbá  sentru saude ho postu saude iha area rural sai problema bo'ot no fasilidade balun la apropriadu, no rekursu umanu iha saude nia to'o agora sai problema.

"Ita hatene Profesional saude balun rekruta to'o ikus truka ho sira ne'ebé foun, maibé sira ne'ebe iha esperensia hasai ida sai problema ba saude nian," Nia Akresenta

Agora atu hateten orsamentu ne'ebé iha husu ba Governu liu husi Ministeriu Saude tenke ezekuta lolo'os hodi apoiu ba pasiente sira no halo tratamentu saude ba povu ho Diak.

Ho nune'e, objetivu husi atendementu saude publiku atu hatudu resultadu diak ba povu sira, aleinde ne'e asuntu seluk ligadu ho orsamentu barak aloka pasiente barak ba halo tratamentu iha rai liur.

Tanba akontese hirak liu ba to'o agora haruka pasiente sira ba halo tratamentu iha nasaun Indonesia, Malaysia ho Singapura.

HAK husu Ministeriu Saude atu redus numeru sira ne'e hodi hadi’a kondisaun hospital iha rai laran, nune'e mos kontinua Profesional saude hasai tan kursu iha espesialidade iha rai liur.

Nune'e, aban bairua sira fila mai Timor-Leste hodi kontinua kontribui servisu atendementu saude iha publiku ho kualidade diak liu tan.