Ministru Ensinu Superior Siensia no Kultura José Honório hatete, hahalok asediu Sexual ne’e ladi’ak, tanba ne’e ministeriu servisu hamutuk ho ajensia internasionál KOIKA ho UN Women hodi estabelese zero toleransia iha ensinu superior sira.
“Ohin Ministeriu Ensinu Superior Siensia no Kultura hamutuk ho KOIKA, UN Women no ensinu superior sira hotu iha Timor laran tomak, ami hahú halo atividade ida ne’ebé importante iha ita nia rai, liuliu ligasaun ho asediu sexual, tanba esediu sexual ne’e buat ida ne’ebé ladi’ak,” dehan Ministru iha Salaun Ótel Timor Kolmera, Segunda (18/11).
Governante ne’e hatutan, tanba ne’e, MESSK asina plaka ho Universidade no Institutu sira kona bá zero teleransia, tanba ema hotu hatene katak asediu sexual ne’e hahalok ida ne’ebé ladi’ak, hahalok ida ne’ebé hamonu ema nia dignidade.
Nune’e, Ministru José Honório husu bá estudante no dosente sira banhira hasoru asediu sexual tenki brani hodi ko’alia sai.
Nia parte mós agradese ba ensinu superior hotu, tanba bele partisipa maximu no kompromete katak sei realiza diak atividade kona bá zero toleransia bá asediu sexual iha ida-ida nia universidade no institutu.
Iha fatin hanesan, Reitór Universidade da Paz (UNPAZ), Adolmando Soares Amaral hatete, Universidade asina ona plaka ho governu ho ajensia sira kona-bá zero toleransia ba asediu seksual, maibé ida ne’e la fasil atu rezolve kedas tanba ema hotu-hotu hanoin la hanesan.
Tanba ne’e, nia parte sei fó informasaun ka halo sosializasaun ba estudante, dosente no funsionariu sira atu labele tauk ko’alia sai bainhira hetan asediu seksual.
“Ha’u hanoin depois de ita asina, ita labele rezolve kedas problema hotu-hotu tanba ema nia hanoin lahanesan, maibé hanesan reitór ita nafatin fahe informasaun, sosializa nafatin ba funsionariu no estudante sira bainhira hetan atendimentu ruma ne’ebé la di’ak relasiona ho asediu seksual sira, nune’e husu ba sira halo favór brani bele ko’alia sai atu ita bele prosesa autór sira,” dehan Reitór.
Enkuantu, Ensinu Superior sira teritoriu laran tomak hamutuk 19, maibé iha Universidade sia (9) mak asina uluk ona plaka no sanolu (10) seida’uk tanba la marka prezensa.
