Sekretariu Jeral TLPU, Zezito Silva deklara, TLPU konkorda halo revizaun ba Lei Komunikasaun Sosial hodi aumenta artigu balun kona-ba plataforma digital ne’ebé daudauk ne’e seidauk prevee.
Iha Lei KomSos daudauk ne’e, nia dehan, haree liu ba media konvensional sira hanesan imprime, radio no televizaun.
Tan ne’e, nia afirma, iha nesesidade atu halo revizaun hodi aumenta artigu balun kona-ba media digital nian.
Maibé, nia hatutan, laiha nesesidade atu inventa fali artigu balun ne’ebé koalia kona-ba atribuisaun karteira profisional ba media officer sira.
"TLPU la konkorda atribui karteira profissionál ba média officer sira, konkorda de'it halo mudansa ka aumenta artigu ida kona-ba servisu digitál jornalista ninian ida ne'e de'it,” dehan Zezito ba jornalista Jornál INDEPEDENTE, iha Faról, Sesta (26/07).
Tanba, Sekjer TLPU ne’e esplika, bainhira koalia kona-ba jornalista ne'e ema ne'ebé hala'o atividade jornalistiku lorloron hodi serbi públiku liu husi informasaun no publika liu husi plataforma média sira hanesan imprensa, rádiu, televizaun, no online sira ne'e.
Agora, media officer sira ne’e la tama iha kategoria jornalista tanba ninia substansia kobertura ne'e iha nia instituisaun de'it hodi promove atividade instituisaun nian, la'ós serbí públiku.
"Jornalista ne'e serbí públiku, média officer ne'e serbí ninia instituisaun, nia espasu kobertura ne'e nia halo kobertura iha ninia instituisaun de'it, atu promove nia instituisaun. Agora jornalista servisu ba públiku ne'e nia halo kobertura ne'e ba povu, estadu nian, ba problema hotu-hotu, ba dezenvolvimentu hotu-hotu ne'ebé akontese iha rai ida ne'e," nia esplika.
Molok ne’e, Prezidente Konsellu Imprensa Timor-Leste, Otelio Ote hatete, daudauk ne’e KI hahu halibur ninia idea produtivu kona-ba inistiva husi Sekretariu Estadu Komunikasaun Sosial (SEKomS) atu halo revizaun bá Lei númeru 5/2014 kona-ba Komunikasaun Sosial.
"Ita hatene katak SEKomS hakarak halo revizaun ba Lei Komunikasaun Sosial númeru 5/2014. Konsellu Imprensa fulan hirak liu ba halo ona leitura ba ita-nia Lei Komunikasaun Sosial, no halo ona avaliasaun ka textu importante artigu pur artigu no ita mós halo ona mudansa balun iha artigu sira ne'e," dehan Ote ba jornalista Jornal INDEPENDENTE, iha salaun Radio Liberdade, Hudi-Laran, Kinta (25/07).
Tuir Ote, Lei KomSos hanesan parte importante ida ba formatu media, tanba lei ne’e la tau media plataforma digital sira, nune'e ho revizaun ne’e buka meius oinsa bele hatama artigu ida hodi tau ona plataforma digital.
Aleinde ne’e, Ote mós koalia kona-ba karteira profisional ne’ebé karik presiza mós atu atribui ba media officer sira.
"Ita mós iha sistema balun purezemplu ita-boot sira asiste Konsellu Imprensa rasik iha sistema balun kona-ba nivel karteira profisional, ita uza de'it karteira profisional no estajiariu profisional, entaun ita tenke tau nivel ida oin seluk tan, purezemplu karik media officer sira bele tama iha komunidade jurnalisimu, siginifika bele rekoñese sira atu sira mós hetan karteira profisional. Ida ne'e idea sira ne'ebé berkembang. Ita espera SEKomS sei konsulta ho sira seluk, depois ba ona konsultasaun publika par ikus junta draft ida husi SEKomS no lori ona ba Konsellu Ministru halo apresiasaun,” Ote esplika.
Aleinde ne’e, Ote dehan, KI mós hanoin kona-ba kompozisaun Konseleiru KI nian, katak mantein na’in lima ka aumenta ba na’in hitu.
"Ami mós koko hanoin kona-ba KI nia kompozisaun presiza lima de'it ka presiza to'o hitu tanba media dijital mós komesa aumenta, ita persiza hamosu kna'ar sira seluk iha KI. Maibé ne’e Konsellu Ministru mak sei halo apresiasaun hodi deside ida ne'ebé mak di'ak," katak Prezidente KI ne’e.
