Prezidente Konsellu Imprensa Timor-Leste, Otelio Ote hatete, daudauk ne’e KI hahu halibur ninia idea produtivu kona-ba inistiva husi Sekretariu Estadu Komunikasaun Sosial (SEKomS) atu halo revizaun bá Lei númeru 5/2014 kona-ba Komunikasaun Sosial.
"Ita hatene katak SEKomS hakarak halo revizaun ba Lei Komunikasaun Sosial númeru 5/2014. Konsellu Imprensa fulan hirak liu ba halo ona leitura ba ita-nia Lei Komunikasaun Sosial, no halo ona avaliasaun ka textu importante artigu pur artigu no ita mós halo ona mudansa balun iha artigu sira ne'e," dehan Ote ba jornalista INDEPENDENTE, iha salaun Radio Liberdade, Hudi-Laran, Kinta (25/07).
Tuir Ote, Lei KomSos hanesan parte importante ida ba formatu media, tanba lei ne’e la tau media plataforma digital sira, nune'e ho revizaun ne’e buka meius oinsa bele hatama artigu ida hodi tau ona plataforma digital.
Aleinde ne’e, Ote mós koalia kona-ba karteira profisional ne’ebé karik presiza mós atu atribui ba media officer sira.
"Ita mós iha sistema balun purezemplu ita-boot sira asiste Konsellu Imprensa rasik iha sistema balun kona-ba nivel karteira profisional, ita uza de'it karteira profisional no estajiariu profisional, entaun ita tenke tau nivel ida oin seluk tan, purezemplu karik media officer sira bele tama iha komunidade jurnalisimu, siginifika bele rekoñese sira atu sira mós hetan karteira profisional. Ida ne'e idea sira ne'ebé berkembang. Ita espera SEKomS sei konsulta ho sira seluk, depois ba ona konsultasaun publika par ikus junta draft ida husi SEKomS no lori ona ba Konsellu Ministru halo apresiasaun,” Ote esplika.
Aleinde ne’e, Ote dehan, KI mós hanoin kona-ba kompozisaun Konseleiru KI nian, katak mantein na’in lima ka aumenta ba na’in hitu.
"Ami mós koko hanoin kona-ba KI nia kompozisaun presiza lima de'it ka presiza to'o hitu tanba media dijital mós komesa aumenta, ita persiza hamosu kna'ar sira seluk iha KI. Maibé ne’e Konsellu Ministru mak sei halo apresiasaun hodi deside ida ne'ebé mak di'ak," katak Prezidente KI ne’e.
Molok ne’e, Sekretáriu Estadu Komunikasaun Sosiál (SEKomS), Expedito Dias hatete, Lei Komunikasaun Sosiál produs iha 2014, ho avansu teknolójia ne'ebé maka'as tebetebes, SEKomS hamutuk ho Konsellu Imprensa halo hela revizaun ba artigu balun ne'ebé ladun update ona iha situasaun atual.
"Iha situasaun uluk iha maibé seidauk tama iha Lei Komunikasaun Sosiál, iha revizaun ne'e ami sei aumenta tan artigu balun, liu-liu kona-ba kompeténsia Konsellu Imprensa atu monitoriza plataforma dijitál sira, tantu média sosiál sira," dehan Expedito ba jornalista sira hafoin aúdensia ho Prezidente Repúblika, José Ramos Horta, iha Palasiu Prezidensiál, Bairu-Pite, Sesta (19/07).
Iha Lei KomSos atual, nia dehan, seidauk iha artigu ida ne'ebé fó kompetensia ba KI oinsá bele tau-matan no monitoriza produtu jornálistiku iha plataforma online no dijitál.
Nune'e, nia hatutan, iha revizaun ne'e sei aumenta artigu balun atu bele fó kompeténsia ba KI.
"Revizaun ida ne'e agora sei iha prosesu diskusaun, Konsellu Imprensa mós halo hela revizaun no SEKOMS mós hamutuk ho jurista sira halo hela, depois ami sei tau hamutuk revizaun ne'ebé Konsellu Imprensa ho SEKOMS halo, depois hotu tiha ami sei konsulta ba iha públiku, sosiédade sivil, média na'in sira, organizasaun jornalista sira depois hotu-hotu fó ideia loos ona mak ami foin lori ba Konsellu Ministru aprova depois sei lori ba Parlamentu Nasionál atu bele aprova hanesan Lei Komunikasaun Sosiál," dehan nia.
