Komandante TLPDP Detective, Superintendent Darren Boyd Skinner hateten, apoiu hirak ne’e atu fasilita membru PNTL sira-nia servisu.
“Ohin ami kontente hodi oferese ba PNTL motorizada unidade 24 ho marka Honda Beat, TLPDP ninia papél iha Timor-Leste atu apoiu PNTL ba nia programa prioridade ba Polisiamentu Komunitária no rezilénsia instituisaun nian, ami kompriende katak ida ne’e importante, teb-tebes ba rekursu no mobilidade no serbisu ne’ebé maka'as teb-tebes hodi fornese propriedade hirak ne’e” dehan Darren liu husi komunikandu ne’ebé Online INDEPEDENTE asesu iha Pajina PNTL, Tersa (06/07).
Superintendente Darren hatutan, ida ne’e hanesan meius ida atu refleta ita-nia parseiru ne’ebé forte ba oin, haree ba avaliasaun ba nesesidade ida ne’e hatudu momós katak Unidade Apoiu ba Pessoa Vulnerável (VPU) iha munisípiu sira iha nesesidade signifikante tebes ba mobibilidade nian.
Nia afirma, tanba Violénsia Doméstika no Violénsia Bazeia ba Jeneru (VbJ) sai dezafiu ida ne’ebé ultrapasa ba iha juridisaun hotu-hotu tanba ne’e, papél polísia nian importante teb-tebes ba seguransa iha komunidade, tanba ne’e motorizada unidade 14 ne’e, sei aloka ba Unidade VPU iha kada munisípiu.
Enkuantu, Motorizada ida (1) sei entrega ba Gabinete Igualdade Jeneru (IJI) tanba sira hala'o sira-nia serbisu ne’ebé exelente tebes ba iha implementasaun rekomendasaun iha jender Audit nian, adisionalmente fornese mós motorizada unidade 5 ba Departamentu Investigasaun Kriminál hodi utiliza ba Ofisiais vizilánsia sira ne’ebé foin lalais ne’e kompleta sira-nia formasaun ba programa vizilánsia internasionál nian.
No ikus liu iha Motor haat (4) fornese ba ekipa Forensik ninian atu permite sira hodi responde ba iha krime lokál atu ezamina nomós rekolla evidénsia sira Forensik nian, hodi apoiu ba investigasaun PNTL nian. Motorizada ne’e kompleta ho box iha kotuk atu nune’e permite ekipa forensik tau sira-nia ekipamentu forensik nian.
No TLPDP agora apoiu hela PNTL atu kumpri nia misaun konstitusional hodi asegura lei no ordem espesialmente ba operasaun iha vizita Sua Santidade Papa mai Timor-Leste, asistensia hirak ne’e inklui haforsa ka melhoramentu ba CCTV, aumenta numeru radio komunikasaun nomos asesoris hirak ne’ebe maka disponivel.
Iha okaziaun ne’e, Komandante Jeral PNTL Komisáriu Jerál Polísia Henrique da Costa hatete, TLPDP sai nafatin parseiru prinsipál PNTL ninian ne’ebé estabelse ona dezde tinan 2004 to’o agora ohin loron no selebra tinan 20 parseria PNTL ho TLPDP.
“Ita husu atu nafatin mantein ita-nia amizade no serbisu hamutuk iha parte TLPDP prontu nafatin apoiu hasa'e kapasidade membru PNTL nomós identifika difikuldade ne’ebe PNTL enfrenta ho posibildade ita-boot sira-nia bele nafatin asiste ami hodi mellora ami-nia ekipamentus no kapasidade atu nune’e ami bele fornese atendementu ne’ebé di’ak no kualidade ba povu. Espera katak apoiu ida ne’e la'os ikus mais buat barak sei mai tan,” dehan Komisáriu.
Komisáriu mos husu ba parte administrasaun PNTL, Xefe Departamentu Administrasaun e Lojístika no Xefe transporte e Manutensaun atu rejista motorizada no tenda atu sai asset PNTL nian no ita tenke uza ho kuidadu nomós haree ba manutensaun.
“Jere didiak, manutensaun importante tanba sasan ema bele entrega foun maibe wainhira ita la kuidadu sasan hirak ne’e sei laiha folin,” Nia alerta.
Serimonia distribuisaun motorizada ne’e kompostu husi bensaun husi Amu Kapelaun PNTL Pe. Abril Lopes, entrega save husi komandante TLPDP ba Komandante Jeral, Asina akta entrega no hasai foto hamutuk.
Apoiu TLPDP nia kompostu husi motorizada unidade 24 kompleta ho kapasete no olio motor nomos Tenda 20.
