Xefe Seksaun Manutensaun Sinais Tranzitu, Diresaun Nasional Transporte Terestre (DNTT), João Eusebio C. da Silva informa, durante vizita Amu Papa, transporte públiku no privadu sira labele halo movimentu.

"Antes Amu Papa to'o mai (Dili) ita sei fó sai karta avizu (katak) loron tolu labele halo movimentu iha área Tasi Tolu,” dehan nia.

Transporte públiku sira husi Likisa, Ermera no Maliana labele hatun pasajeiru iha Tasi Tolu maibé hatun iha Tibar mak lao mai.

“Mikrolete 09, 010, 03, no 011, no transporte privadu sira labele halo sirkulasaun komesa iha loron 9 to'o 11," dehan João ba Jornalista INDEPENDENTE, iha knaar fatin, Balide Kuarta (07/08).

Durante Amu Papa iha Dili, nia hatutan, autoridade sira sei halo pasa revista ba transporte ne'ebé bele tama ba Tasi Tolu.

"Ema hotu-hotu lao ain de'it tanba ema atu ba misa iha Tasi Tolu, kecuali sarani sira husi Dioseze Baukau mai hela iha Hera mak mai ho transporte tuun iha Rotunda Komoro, mais populasaun husi Ainaru, Suai, Same sira mai hela iha Kasnafar lao ain, ne'ebé transporte sira ne'ebé atu tama ne'e iha autorizasaun mak bele tama," dehan nia.

Parte DNTT, nia hatutan, sei halo enkontru ho Polisia Tranzitu no Sekretariadu Komisaun Santo Padre, molok fó sai karta avizu ba públiku.

Iha fatin ketak, kona-ba mobilizasaun sarani husi munisipiu mai partisipa iha misa Tasi Tolu, Vise Koordenadór Altu Nivel Vizita Amu Papa no atual Ministru Administrasaun Estatal, Tomas do Rosario Cabral informa, governu prepara akantonamentu ba sarani sira husi munisipiu ne’ebé mai partisipa iha misa ne’ebé Amu Papa preside.

Akantonamentu ne’ebé governu prepara ba sarani sira iha Hera, Kasnafar no Tibar.

"Akantonamentu ita prepara hela tuir kapasidade ne'ebé sira iha, ADN serbisu hela iha ne'e no Obras Públiku, ita kria kondisaun par ita-nia maluk sira mai husi foho bele hela, bele hetan fatin ida ke di'ak no bele hetan asesu Amu Papa nia vizita ne'e," dehan Ministru hafoin partisipa reuniaun Konsellu Ministru, iha Palásiu Governu, Kuarta (07/08).

Kona-ba orsamentu atu mobiliza sarani husi munisipiu, nia dehan, orsamentu ne'ebé prepara so Munisipíu Dili ho Atauro mak rihun $20 no boot liu mak Oekusse ho rihun $50.

"Ita hatene ita mobiliza ema mai ita presiza transporte, sira mak sukat transporte iha ne'ebé mak atu lori lori mai. Karreta ida labele lori (ema) liu (na’in) 50. Serake ita iha karreta sufisiente atu tula sarani sira mai? Ita entrega ba iha Komisaun Organizadora Munisípal ho Amu Paróku, inklui mós Xefe Suku no Xefe Aldeia no Katekista sira hamutuk iha Dioseze idaidak ka Munisipíu idaidak sira mak organiza," nia dehan.

Iha 10 Setembru, bainhira atu ba partisipa misa, nia dehan, sei iha transporte ne’ebé tula sarani sira no hatuun iha rotunda Nicolau Lobato, Komoro, hafoin lao ba Tasi Tolu.