Diretor Ezekutivu TLCE José Monteiro hatete, Ministériu Edukasaun (ME) tenki dada fila-fali nia desizaun hodi re-avalia fali atu nune’e foti fali desizaun sira ne’ebé mak fó benefisiu ka ajuda iha asuntu edukasaun nian.
Nia dehan, ME hapara profesór sira ne’ebé hanorin ona durante tinan barak nia laran ne’e la’os atu hamenus problema maibé ne’e aumenta problema.
“Problema pofesoes la’os foin eziste agora no tanba problema profesores barak eziste kleur ona no ema ezize direitu nudar servisu vokasional ida tan ne’e sira merese atu goja rejime espesial,” dehan Diretór Ezekutivu iha nia knar fatin Kaikoli, Kuarta (24/01).
Nia esplika, tan ne’e husu ba Ministeriu Edukasaun tenki iha kapasidade hodi buka solusaun ne’ebé bele pertense ba profesor ninia moris di’ak, tanba atu garante edukasaun saudável tenki maioria profesor sira ne’ebé saudável.
Tanba profesor sira hanorin tinan barak ona, no fó kontribuisaun makas ba prosesu dezenvolvimentu edukasaun nian ne’e ME la rekonhese maibé to’o fali tempu sira asina kontratu hodi hetan osan oituan ME rekonhese fali katak iha profesor voluntáriu no kontratadu.
“Profesor voluntariu sira mai ajuda prosesu aprendizajem ita la kestiona no husik ema hanorin to’o tinan sanolu liu Ministériu husik de’it no ema mós la husu sira-nia direitu, maibé agora atu hasai sira rekonhese fali katak profesór voluntáriu no kontratadu ne’e ne’e iha hodi hasai,” dehan Diretór.
Nia akresenta, profesór sira ne’ebé hanorin ona estudante sira ho tinan barak ona ne’e pertense husi elementu tomak integradu ba iha ME.
Tan ne’e desizaun ida ME hodi la iha asaun kontinuasaun ba profesor rihun ida resin ninia responsabilidade ba oin ne’e hatudu katak ME la iha responsabilidade ba elementu ne’ebé mak durante ne’e kontribui ona ba iha dezemvolvimentu edukasaun.