Diretor Ezekutivu TLCE, José Monteiro hatete, Ministériu Edukasaun banhira hasai desizaun ho arogante ne’e la resolve problema, tanba ME taka eskola sira ne’ebé loke husi komunidade ho profesores sira estudante sira atu ba eskola fali iha ne’ebé.
“Se eskola sira taka ne’e estudante sira ba fali ne’ebé, ME labele trata sasan hanesan ne’e, ne’e arogante, banhira hasai desizaun arogante ne’e sei la resolve problema,”dehan dehan Diretór Ezekutivu iha nia knar fatin Kaikoli, Kuarta (24/01).
Diretór Ezekutivu akresenta, ME labele dehan eskola sira ne’e la prense rekezitus, eskola ne’e prense rekezitus mak durante estudante sira uza ne’e, maibé ME mak la iha kapasidade dezenvolve di’ak liu tan eskola ne’ebé loke husi komunidade sira. Tanba eskola sira ne’e prense rekezitus mak loke ne’e.
Enkuantu, iha sorin seluk SEESJESTV Domingos Lemos Lopes hatete sei taka eskola sira iha teritoriu laran tomak ne’ebé la prense rekezitus no kritériu husi ME.
Governante ne’e dehan, sei haruka ekipa ba halo monotorizasaun ba eskola sira iha teritoriu laran tomak hodi detekta eskola ne’ebé sira ne’ebé la prense rekezitu sei taka tiha.
“ami sei haruka ekipa ba munisípiu sira para monitór eskola sira ne’ebé mak iha informasaun loke eskola sem konhesimentu husi ME ita haree la prense rekezitus ne’e ita taka tiha,” dehan Governate ne’e.
Nia dehan, eskola sira ne’ebé la prense rekezitu taka tiha tanba sira lakoi kria tan profesor kontratadu no voluntáriu barak iha eskola.
“tanba komunidade sira loke eskola depois kria tan profesor voluntáriu, ne’ebé ami sei haree ida ne’e ho rigorozu oituan atu hare para eskola sira ne’ebé mak loke sein koñesimentu husi ME ne’e ita sei haruka para, no eskola sira ne’e seidauk detekta maibé tempu badak ita-nia ekipa sei tun atu halo monitorizasaun,” nia hakotu.