Diretór Jeral Ensinu Sekundáriu Deolindo da Crus hatete, Ministeriu Edukasaun (ME) seidauk hasai sirkular ida hodi bandu profesor parsiál sira ne'ebé selu husi kontribuisaun inan-aman nian.
Nia dehan, ME hasai de'it sirkular ida kona-ba bandu eskola atu halo konbransa ilegal ba estudante sira iha prosesu mátrikula ho objetivu atu garantia sidadaun hotu nia direitu no oportunidade ba asesu edukasaun.
“Sirkulasaun refere la ko'alia ou fó orientasaun ba eskola sira atu hapara profesores parsiál sira ne'ebé durante ne'e selu husi kontribuisaun inan-aman (asosiasaun dos pais) no voluntariu. nee lalos,” dehan Diretór Jeral iha salaun Konferensia ME Kuarta (24/01).
Enkuantu, tuir Portavóz Profesór Kontratadu Agustinho Pinto katak, banhira sira ba eskola atu hanorin maibé Diretór eskola sira labele fó sira hanorin tanba despaixu tun ona, tan ne'e sira parte husu ba ME hatudu baze legál ida ho razaun saida mak labele haruka sira atu hanorin.
“ami ba eskola Diretor eskola sira la fó ami hanorin tanba despaixu tun ona, tan ne'e ami husu ME atu fó baze legál no ho razaun saída mak ami labele hanorin,” dehan Porta voz.
Iha sorin seluk, Diretór Servisu Edukasaun Munisípiu Carlito Soares hatete, relasiona ho hapara profesór parsiál ne'e la iha karta sirkular maibé tanba ME bandu ona eskola halo kobransa ba estudante entaun eskola labele fó sira atu hanorin tanba la iha osan atu selu ba sira.
Tanba osan ne'ebé atu selu ba profesór parsiál sira ne'e mai husi kontribuisaun inan-aman estudante nian.
“No mós Ministra nia deklarasaun liu husi média katak profesor ne'ebé kontratu hirak ne'e la iha ona ligasaun legál ho ME, no mós dala ruma baziea ba levantamentu dadus ne'ebé halo ne'e mak halo profesores sira la hanorin nune'e mós kona-ba kontribuisaun.,” dehan Diretór SEMD.
