Diretora Jeral Prestasaun Saúde, MS, Odete da Silva Viegas hatete, maske númeru kazu Covid-19 iha TL tuun ona, maibé TL mós hahú rejista ona variante Omicron.

“Probabelmente kazu sira pozitivu daudauk ne’e ita bele suspeita ona ba variante foun Omircron ne’ebé bele mós halo ona transmisaun iha komunidade nia leet,” dehan Odete hafoin vizita kortejia iha edifisiu Servisu Apoiu Mediku no Ekipamentu Saúde (SAMES), Kampung Alor, Dili, Kuarta (02/02).

Maske nune’e, Odete husu ba populasaun tomak atu labele paniku, maske Omicron nia transmisaun lalais maibé nia gravidade laiha, signifika katak ema idaidak persiza intensifika nafatin medida prevensaun liu husi uza nafatin maskra, fase liman, reduz halibur-malu, no mantein distansia fiziku.

Nia husu nafatin ba komunidade sira ne’ebé seidauk simu vasina atu tenke hakbesik aan ba fasilidade saúde.

“Ita-nia preokupasaun ba ema ho idade idozu no ema sira ne’ebé mak ho komorbilidade ne’ebé mak seidauk hetan vasina, tanba ne’e husu nafatin ema hotu nia kolaborasaun atu simu vasina,” nia dehan.

Ba kazu omicron, nia informa, kazu ne’e mai husi rai li’ur. Iha 30 Dezembru 2021 bainhira ema na’in rua husi tuun iha Aeroportu Nicolau Lobato deteta pozitivu, nune’e ekipa vizilansia haruka kedas amostra ba Laboratoriu Australia no iha 29 Janieru rezultadu hatudu pozitivu Omicron.

“Sira na’in rua daudauk ne’e ida iha izolamentu no ida mak halo auto-izolamentu iha uma,” nia informa.

Iha parte seluk, Xefe Departamentu Emerjensia Hospital Nasionál Guido Valadares, Vidal de Jesus Lopes informa, relasiona ho kazu Covid-19 ne’ebé kontinua eziste, HNGV nia sistema atendimentu kotinua hanesan uluk katak ida ne’ebé mak klasifika sintomas tenke halo teste swab.

“Ami sempre halo swab ba sira ne’ebé mak mai ho sintomas respiratoriu, ba pasiente sira ne’ebé atu baixa tenke swab lai mak baixa iha ne’e, se pozitivu tenke haruka liu ba Lahane,” dehan nia.