Tuir dadus husi Ministeriu Saúde liu husi Diresaun Nasional Saúde Públiku, Departamentu Vijilansia Epidemolojia relata, iha inisiu fulan-Janeiru to’o loron 3 Fevereiru tinan nee, kazu dengue sa’e ba 1.407. Husi númeru nee na’in 22 mak lakon ona vida.

“Husi númeru kazu neebé relata, iha Kapital Dili ho kazu 13, Ermera ho kazu 4, Ainaro ho kazu ida, Bobonaro ho kazu ida, Kovalima ho kazu rua no Vikeke ho kazu ida,”dehan komunikadu neebé Online INDEPENDENTE asesu, kinta nee (03/02).

Enkuantu, haree husi númeru kazu neebé rejista, iha Kapital Dili kontinua ho númeru aas ho total kazu hamutuk 925, Manatuto iha kazu 92,  Ermera iha kazu 77, Baukau iha 68,  Manufahi 58, Kovalima 50, Vikeke 21, Aileu 20,  Ainaro 14 no RAEOA iha kazu 3.

Entretantu, molok nee, Ministra Saúde, Odete Maria Freitas Belo, hatete, Ministeriu Saúde kontinua esforsu halo asaun prevensaun hodi kombate moras dengue iha Timor-Leste.

"Ita nia asaun no antisipasaun sira ba situasaun dengue ne'ebé dadaun ne'e kontinua la'o, ho esforsu halo asaun prevensaun hodi hala'o fumigasaun atu bele kombate moras dengue iha Timor-Leste," dehan nia iha PN, segunda foin lalais (31/01).

Nia hatutan, asaun prevensaun importante seluk mak halo promosaun saúde kona ba ema ida-idak oinsá halo ninia prevensaun iha ida-idak nia uma, halo kampaña hodi fahe informasaun no reativa atividade ekipa task force, atu hala’o servisu ativu no promove partisipasaun autoridade lokál no komunidade halo limpeza jerál iha ida-idak nia bairu.