“Importante tebes atu dosente no estudante sira iha sala aula ne’ebé adekuada, laboratóriu espesializadu no biblioteka, hodi partisipa ho ativa iha prosesu ensinu no aprendizajen,” dehan Ministru Ensino Superior Siensia no Kultura (MESSK) Longuinhos dos Santos, iha ambitu serimonia inagurasaun edifisiu foun ba fakuldade ekonomia no jestaun, iha UNTL Liçeu, Dili, kinta nee (03/02).
Nia hatutan, inaugurasaun edifísiu ida-ne’e, iha signifikadu boot tebes, tanba bainhira UNTL iha kondisaun ne’ebé di’ak, ne’e reprezenta mós oportunidade atu hadi’ak liutan kualidade rekursu umanu ne’ebé permite atu Nasaun bele kumpri nia mehi ba dezenvolvimentu nasionál no bele sai Paíz ida ne’ebé justu no prósperu.
Ho nunee, Governante nee apela ba dosente no estudante sira atu tau-matan ba instalasaun sira-ne’e ho haree-didi’ak no uza edifísiu ne’e ho objetivu atu hadi’ak prosesu ensinu no aprendizajen nian, tanba Estadu investe ona hodi harii edifísiu ne’e no presiza tau onra ba esforsu finanseiru ida-ne’e.
Iha fatin hanesan, Reitor UNTL Joaõ Martins, hatete, durante ne'e UNTL infrenta hela problema infrastrutura partikuralmente sala aula.
Tanba nee, edifisiu foun neebé estabelese, bele melhoriza liu di'ak liu tan kondisaun infrastrutura, liu-liu sala aula ne'ebé adekuadu ba estudante sira atu bele aprende.
Nia esplika, edifisiu refere ba iha resintu fakulkuldade ekónomia no jestaun nian, tanba fakuldade refere, enfrenta hela sala aula.
Entretantu, Diretór Kompaña Aitula, Silveiro Pereira Maubere, hatete, kompaña ho UNTL halo akordu ba konstrusaun edifisiu refere hahú iha fulan-Dezembru tinan 2019 hahú hala’o konstrusaun iha Janeiru 2020 to’o finaliza hafoin halo inagurasaun iha 3 Fevereiro 2022.
Enkuantu, total orsamentu ba konstrusaun edifisiu refere hamutuk dolar amerikanu $6.670.
Nunee, edifisiu foun fakuldade ekonomia no jestaun ho nia medida andar tolu ho sala aula hamutuk 18.
Asistente Editor: Saturnina da Costa
