Kordenador Forsa-Tarefa ba Prevensaun no Mitigasaun Surtu Covid-19, Rui Maria de Araújo informa, ohin 21 fulan-Marsu 2021, Timor-Leste kompleta ona tinan 1, kontinua deteta kazu foun 55, no total pasiente hamutuk 206.
“Dadus ne’ebé iha, hatudu katak husi loron 21 fulan Marsu 2020 to’o loron 22 fulan Fevereiru 2021, kazu Covid-19 ne’ebé deteta iha Timor-Leste importadu no esporádiku,”dehan nia liu husi telekonferensia iha CCD,(21/3)
Rui informa, hahú 22 fulan Fevereiru 2021, hafoin deteta kazu iha Aldeia Klauhalek, Suku Belulik Leten, Postu Administrativu Fatumea, Munisipiu Covalima, Timor-Leste hahú tama iha faze transmisaun cluster ka transmisaun lokal, tuir definisaun OMS nian.
Iha fulan ida ikus nia laran, fenómenu transmisaun Cluster espalla mós iha Kapital Dili, Munisipiu Baucau no Munisipiu Viqueque.
Rui esplika, ohin loron 21 fulan marsu iha Munisipiu Dili iha kazu foun 43, ho detalles hanesan, kazu pozitivu 1, hela iha Aldeia Berbidu, Suku Becora, Posto Administrativu Cristo Rei. Pozitivu ida ne’e kontaktu-besik ho kazu konfirmadu iha cluster HNGV.
Kazu pozitivu 9, hela iha Aldeia Bidau Tokobaru 2, Suku Kulu-hun, Postu Administrativu Cristo Rei. Pozitivu hirak ne’e kontaktu-besik ho kazu iha cluster hanesan, ne’ebé anunsía horiseik loron 20 fulan Marsu.
Kazu pozitivu 26, hela iha Aldeia 20 de Setembro, Suku Bebonuk, Postu Administrativu Dom Aleixo. Pozitivu hirak ne’e kontaktu-besik ho kazu iha cluster hanesan.
Kazu pozitivu 7, hela iha Aldeia Grilos, Suku Gricenfor, Postu Administrativu Nain Feto. Pozitivu hirak ne’e kontaktu-besik ho kazu husi cluster hanesan.
Ho nune’e, kazu detetadu ka pozitivu iha Munisipiu Dili husi loron 7 fulan Marsu 2021 to’o ohin 21 fulan Marsu tinan 2021, hamutuk hotu 179.
Ho baze ba informasaun ne’ebé ekipa konjunta saúde nian rekolle, foku/cluster kazu pozitivu iha Dili, fahe ba cluster 34, namkari iha instituisaun 4, eventu 1, Suku 10, fatin kuarentena 1, iha Postu Administrativu D. Aleixo, Vera Cruz, Nain Feto & Cristo Rei.
Husi cluster 34 ne’ebé iha, iha cluster 14 mak kazu la aumenta iha semana ida nia laran ona.
Iha Munisipiu Baucau, ohin iha kazu foun 11. Hamutuk hotu Munisipiu Baucau deteta ona kazu konfirmadu nain 19.
Kazu foun hirak ne’e, hela iha Aldeia Builai, Suku Buibau, Baucau Vila. Kazu konfirmadu hirak kontaktu-besik ho kazu husi Aldeia Lamegua ne’ebé anunsia iha dia 19 de Marsu.
Iha Munisipiu Viquque, ohin iha kazu foun 1. Hamutuk hotu Munisipiu Viqueque deteta ona kazu konfirmadu nain 4. Kazu foun ida ne’e, hela iha Aldeia Mamaluk (Beloi), Suku Karaubalu, Viqueque. Kazu konfirmadu ida ne’e kontaktu-besik ho profisionál saúde ne’ebé halo kursu pós-laboral iha UNTL no fila husi Dili ba Vikeke iha loron 8 fulan Marsu.
Atividade prevensaun no mitigasaun Covid-19 iha Munisipiu sira seluk la’o hanesan baibain.
Tuir planu kontinjénsia Governu nian, Timor-Leste iha faze alerta 3, ka iha faze mitigasaun.
“Kazu na’in 55 ohin, iha mane nain 23 no feto na’in 32, iha ema ho idade tinan 0-14 hamutuk na’in 13, ema ho idade entre tinan 16-67 hamutuk na’in 42. Ema ne’ebé sintomátiku hamutuk na’in 9 no ema ne’ebé asintomátiku ka la hatudu sintomas hamutuk na’in 46,”nia esplika.
Husi horiseik mai ohin hamutuk hotu halo 425 testes PCR.
Entretantu kazu foun ba loron ohin 21 fulan marsu hamutuk na’in 55, kazu rekuperadu na’in 3 no kazu ativu iha sala izolamentu hamutuk na’in 206.
