Kordenador Forsa-Tarefa ba Prevensaun no Mitigasaun Surtu Covid-19, Rui Maria de Araújo informa, kazu ativu ne’ebé iha izolamentu, iha paseinte na’in ida ne’ebé tama kategoria moderadu no kazu ida ne’e sofre insufisiensia renal kronika no halo hemodiálize durante tinan rua ona.
“Kazu ida ne’e detetadu positivu loron rua liu-bá, ninia oráriu hemodiálize kinta-feira ho segunda-feira, enkuantu iha loron kinta 18 fulan marsu la konsegue halo hemodiálize tanba unidade hemodiálize HNGV taka hodi halo dezinfesaun,” dehan nia liu husi telekonferensia iha CCD, (21/03).
Ho nune’e horikalan loron 20 fulan marsu iha sala izolamentu Tasitolu, pasiente iha problema oksijenasaun no ekipa médika izolamentu nian deside transfere ba Vera Cruz nu’udar fatin ne’ebé preparadu atu halo izolamentu ba kazu moderadu sira, nune’e to’o ohin lokraik loron 21 fulan marsu, pasiente ne’e nia kondisaun estável.
“Nia kontinua halo tratamentu ba hipertensaun no aban ninia oráriu atu halo hemodiálize iha HNGV, ne’ebé prepara ona fatin espesiál ba halo hemodiálize ba ema sira ne’ebé mós pozitivu SARS-CoV-2,” Rui informa
Entretantu, husi loron horiseik loron (20/3) mai ohin loron (21/3) ekipa saúde halo ona teste PCR hamutuk hotu 425.
Nune’e kazu foun ba loron ohin 21 fulan marsu hamutuk na’in 55, kazu rekuperadu na’in 3 no kazu ativu iha sala izolamentu hamutuk na’in 206.
SIJK nafatin apelu ba populasaun sira atu nafatin pratika medidas sira hanesan tuir mai ne’e:
(a) Uza mascara,
(b) fase liman beibeik ho sabaun ka dezinfetante ruma,
(c) evita kose liman ba matan, inus ho ibun,
(d) wainhira kumprimenta malu, lapresiza ka’er liman, bensa-liman, rei-malu ka haku’ak malu,
(e) evita halibur malu barak,
(f) hamri’ik ka tur do’ok husi ema seluk, mínimu metru ida ho balun.
