Prezidente CLN, Augusto Junior Trindade hatete, Governu liuhusi CLN tinan kotuk (2020) hatama fós tonelada rihun 30. Husi total ne’e, distribui ona tonelada rihun 5, no agora hela rihun 25.

Distribuisaun fós ne’e bazeia ba despaisu diploma ministérial (MAKE), númeru 1/2021 26 Fevereiru, relasiona ho serka sanitária implika ba folin sasan sa’e iha merkadu, nunee husu atu halo intervensaun lalais ho objetivu atu normaliza hikas presu iha territóriu tomak.

Bazeiba ba diploma ne’e, CLN halo ona distribuisaun ba munisípiu sira, iha munisípiu hitu mak agora dadaun distribuisaun la’o hela, hanesan Covalima, Bobonaro, Baukau, Lautem, Vikeke, Ainaro no Ermera.

“Munisípiu hitu ne’e la’o hela, no husi loron ba loron aumenta husi munisípiu seluk mós, hanesan ita hateten ona, ita aloka fós kada munisípiu 1.000 tonelada, entaun 7.000 tonelada mak sai ona ba munisípiu hitu ne’e,”dehan Augusto, iha nia knar fatin CLN, Mandarin Bebora, Sesta (19/03).

Signifika kobre ba munisípiu 12 la inklui RAEOA sei aloka hamutuk tonelada rihun 12. CLN nafatin buka dalan liuhusi koperasaun di’ak ho sala situasaun atu fasilita movimentasaun sai husi Dili.

Entretantu, Ministru Turizmu Komersiu no Industri (MTKI) Jose Lucas do Carmo hateten, parte Governu halo ona intervensaun ba Munisípiu Covalima, sei haree mós parte munisípiu seluk, no sei koordena mós ho autoridade sira atu identifika loloos fatin sira ne’ebé hasa’e folin, nune’e AIFAESA mós sei halo kontrolu, labele prejudika folin.

Rekomenda ba negosiadór sira atu halo tuir regulamentu ne’ebé Governu hasai tiha ona atu normaliza folin fós, tanba Timor sei iha situasaun normal.