Ministru Ensinu Superior Siensia no Kultura, Longuinhos do Santos hateten, objetivu prinsipal assina memorandu entre governu TL ho EUA ne'e haree asuntu edukasaun superior ba enterkámbiu nian, atu haree liu ba oinsa atu públika iha jornál sientifika iha semináriu no konferensia sira.
Tuir mai mak, iha interkambiu pesoal akadémika ba dosente no estudante nian no mós iha asuntu prioridade ida mak, atu promove lian ingles ba sidadaun Timoroan sira ne'ebé atu tuir formasaun, hodi hetan oportunidade ba bolsa estudu liu husi programa Bolsa Fullbright ne'ebé oferese husi EUA.
“Memorandu intendimentu ida ne'e, sei tulun Timor-Leste hodi hasai nia kondisaun, atu bele kumpre objetivu iha sétor ensinu superór, hanesan xavi ida no área prioridade sira ba interese nasional husi rai doben Timor-Leste, ba dezenvolvimentu sosiál no ekonomia, tuir Planu Estratéjiku Dezenvolvimentu Nasionál Timor-Leste nian ba 2011-2030,”dehan nia iha Salaun MNEK, tersa ne’e (06/12).
Governante ne’e hatutan, nota intendimentu ne’e, mós sei kontribui atu hakbi'it ka kesi komitmentu husi país rua nian, atu hadia kualidade sistema edukasaun ensinu superior.
Iha fatin hanesan, Enkarregadu Negosiu EUA Tom Daley hateten, nota indentimentu ne'e, sei estabelese baze fundamental ida hodi bele aumenta oportunidade ba edukasaun ba interkámbiu, liliu ba estudante no bolseiru Timoroan sira hodi hala'o edukasaun ensinu superior iha Estadus Unidus.
Nia haktuir, liu husi nota indentimentu ne'e, Estadus Unidus no Governu Timor-Leste konkorda hamutuk hodi enkoraza kooperasaun ba interkámbiu ba estudante, dosente no pesoál akadémiku sira.
Enkuantu, interkámbiu ba infromasaun no peritu sira iha dezenvolvimentu ba área edukasaun superior, no promosaun ba programa lian Inglés hodi fò dalan ba estudante sira asesu ba oportunidade bolsa estudu edukasaun superior iha Estadus Unidus.
"Estadus Unidus Amérika hala'o ona parseria ba tinan naruk ho Timor-Leste liu husi fornese bolsa-estudu ba timoroan hirak ne'ebé ho prestasaun di'ak hodi buka oportunidade ba edukasaun no interkámbiu iha Estadus Unidus," dehan Enkaregadu Negósiu Tom Daley.
Nia akresenta, iha faze dahuluk memorandu intendimentu ne'e sei dispobiniliza númeru boot bolsa estudu hamutuk sia (9) ba estudante timoroan sira atu benifisia bolsu estudu.
"Hanesan parte ida husi ami nia kompromisu ba haburas parseria ida ne'e, ha'u mós orgullu hodi anúnsia ba ita ohin loron katak, Estadus Unidus sei fornese adisionál bolsa estudu sia (9), inklui ba estudante no bolsa estudu timoroan sira hodi hala'o edukasaun no peskiza iha Estadus Unidus. Ami buka hametin ita nia kooperasaun bilateral hodi tulun avansa Timor-Leste nia Planu Estratéjiku Dezenvolvimentu Nasionál," tenik nia.
Tuir planu, iha tinan 2023, Estadus Unidus sei oferese espasu adisionál haat ba estudante timoroan sira hodi hala'o estudu iha nivel Mestradu iha Estadus Unidus liu husi programa Fulbright.
Timor-Leste mós ba dala-uluk sei inklui ba iha programa Fulbright Scholar-in-Residence (rezidénsia-ba-bolsa-Fulbright), ne'ebé sei fó espasu ba manorin timoroan hodi hanorin hamutuk ba kursu universitáriu ida iha Estadus Unidus.
“Anúnsiu ba ohin loron nian inklui ona komprometidu hodi oferese Asistente Hanorin Inglés Fulbright adisionál na'in-rua hodi apoia edukasaun lian Inglés ba Timoroan nia universidade sira no mós adisionál Espesialista Fulbright Amerikanu ida no ba dala-uluk programa Interkámbiu Polítika Públiku - American Fulbright Public Policy Fellowship hodi involve ba projetu interkámbiu tempu-kurtu-prazu ba Timoroan nia instituisaun sira,”nia dehan.
Enkunatu, nia dehan, iha tinan 20 nia laran liuba, Estadus Unidus fó ona oportunidade ba timoroan hamutuk 600 resin hodi tuir oportunidade edukasaun no programa interkámbiu, inklui liu husi Fulbright, bolsa-estudu U.S.-Timor-Leste (USTL), Inisiativa Líder Foin-Sa'e Sudeste-Aziátiku YSEALI), no seluk tan.
