Enkuantu, uma-kain sira husi suku sira iha Kapital Dili, ne’ebé Governu hahú halo pagamentu mak hanesan, Suku Kamea iha Postu Administrativu Kristu Rei, Suku Wenunuk iha Postu Administrativu Metinaro, Suku Lahane Oriental Postu Na’in Feto, Suku Balibar Postu Vera Krus no Suku Komoro Postu Dom Aleixo.
Vise-Primeira Ministra no Ministra Solidariedade Sosial no Inkluzaun, Armanda Berta do Santos hateten, pagamentu ba subsidiu fin do ano ne’e, halo abertura uluk iha Munisipiu Dili, hafoin kontinua ba munisipiu 12, inklui Rejiaun Administrativu Espesial Oekuse Ambeno, iha semana oin.
“Oitavu Governu konstitusional foin primeira vez distribui subsidiu $200 dolar ba kada uma-kain no sei halo iha tinan ida dala ida, Governu la iha buat barak atu oferese ba ita boot sira, maibé só fornese de'it kbiit ne'ebé iha,” dehan Vise Ministra iha Sede Suku Camea, Tersa (06/12).
Vise PM hatutan, osan ne’e fó ba uma-kain ne’ebé ho rendimentu $500 mai kraik. Enkuantu, ba sira ne’ebé ho rendimentu liu dolar amerikanu $500 laiha direitu ba subsidiu refere.
Tan ne’e, bainhira benefisiáriu sira atu simu subsidiu $200 ne’e, sei priense mós deklarasaun ida.
Entretantu, Xefe Suku Kamea, Matos da Costa, hatete, Suku Kamea iha aldeia hamutuk 13 hanesan, Aldeia Haas laran, Lases, Terminal, São Fransisco, Bedois, Aidak Behare, Lamalaek, Bubur-Lau, Caisabe, Lenuk, Ku'un, Ailele-Hun no Ai-Look laran no total uma-kain 3.310 no osan ne’ebé atu selu ba benifisiariu hirak ne’e hamutuk dolar amerikanu rihun $662.
Nia haktuir, Bazeia ba Dekretu Lei Nú. 37/2022, 25 de Maiu ne’ebé hetan alterasaun husi Dekretu Lei Nú.82/2022, 11 de Novembru katak, uma-kain ou benefisiáriu sira ne’ebé mak elijivel ba programa subsídiu fim-do-ano mak, uma-kain hirak ne’ebé, la iha ninia membru uma-kain hetan rendimentu kada fulan ho forma regular dolar amerikanu $500 ou liu, no mós uma-kain ne’ebé rejistu ona iha livru rejistu uma-kain iha suku iha teritóriu nasionál to’o loron 28 Fevereiru 2022.
Nia dehan, ba benifisiariu sira ne’ebé ho rendementu liu dolar amerikanu $500 hakarak simu subsidiu refere mak, Komisaun Anti korupsaun (KAK) no Providoria Direitus Humanus no Justisa (PDHJ) mak sei justifika.
Totál dadus benefisiáriu Munisípiu Díli hamutuk 67.542 ho ninia orsamentu $13.508.400.
