Vise Ministru Negósiu Estranjeiru no Kooperasaun (MNEK), Julião da Silva hatete, Governu Japaun iha ona polítika ba asuntu ne’e no sira nia Embaixada iha Timor Leste komesa fó ona informasaun ba estadu Timor atu kapasita traballadór Timor oan hodi ba servisu iha Japaun.
"Governu Japaun hahú diskute asuntu ne’e no posibilidade sira atu simu traballadór Timoroan ne'ebé sei ba servisu iha Japaun, tan ne’e Governu liu husi SEFOPE hahú esplora oportunidade sira ne'e hodi hare posibilidade atu prepara foinsa'e sira ba servisu iha Japaun," informa Vise MNEK, Julião da Silva ba jornalista sira iha Palasiu Prezidensiál Bairu-Pite, (05/11).
Molok ne'e, Diretór Jerál Sekretáriu Estadu Formasaun Profesionál no Empregu (SEFOPE), Paulo Alves informa, parte SEFOPE halo ona rekrutamentu ba traballadór na'in 20, maibé sei haruka uluk ema na'in neen (6) ba servisu iha Japaun no iha tempu besik sei pronunsia nia rezultadu.
Nia dehan, antes atu haruka traballadór na'in neen ne'e ba asina uluk akordu entre nasaun rua, atu nune'e bele servisu ho legalmente.
Tanba, prosesu ba Timoroan na'in 20 ne'e kompaña hosi Japaun mak mai halo teste ba sira, SEFOPE fasilita de'it, ne'ebé sira dehan iha tempu badak timoroan na'in neen ne'e Bainhira akordu asina ona sei fó oportunidade ba timoroan barak sei ba servisu iha Japaun iha área oi-oin tanba kompaña barak mak hakarak rekruta Timoroan.
Kriteria atu ba servisu iha Japaun nian mak Timoroan ne'ebé aplika tenke iha sertifikadu lian Japaun ho nivel haat ho nune'e SEFOPE halo ona identifikasaun ba fatin formasaun lian Japaun nian hamutuk rua iha Dili laran no sei utiliza de'it timoroan hirak ne'ebé mak tuir ona formasaun lian Japaun ne'e .
