Traballadór Timoroan hirak ne’e sei aranka iha loron domingo (11/12), semana ne’e.

Tuir Embaixadór Korea iha Timor-Leste, Hong Jin Hum, husu ba traballadór sira tenke kumpri lei no regras iha Korea.

"Imi bele ba Korea tanba esforsu no sakrifisiu ne'ebé imi nia maun ne'ebé senior sira balo ona iha pasadu, imi nia komportamentu no servisu di'ak no badinas iha Korea, sei oferese imajen di'ak,”dehan nia iha salaun Ótel Timor Lodge, Komoro, kuarta ne’e (07/12).

Nune’e, nia dehan, bainhira traballadór sira hatudu hahalok diak iha Korea Súl, iha futuru Timoroan barak mak hakarak ba servisu iha ne’ebá.

“Tanba imi ida-idak nia oin reprezenta Timor-Leste iha Korea, nune'e ha'u husu imi labele haluha katak, povo Korea sei koñese no difini Timor-Leste liu husi ita boot sira nia oin no hahalok,”tenik nia.

Embaixadór ne’e mós husu ba traballadór sira atu kuidadu sira nia saúde, atu nune’e labele prezudika fali familia sira.

Entretantu, nia akresenta, Governu Timor-Leste no Governu Korea sei apoiu no kuidadu nafatin traballadór sira durante servisu iha Korea Súl.