Prezidente Komisaun Ezekutivu, BTL, E.P, Carlos Peloi, hatete ho implementasaun projetu ne’e komunidade sira iha suku tolu ne’e bele asesu ona ba bee moos.
“Ohin loron (horseik), ita asina kontratu ida ho ita nia parseiru kompañia lokál hodi bele halo servisu melloramentu sistema bee moos iha Suai Villa, liu-liu iha suku tolu, hanesan suku Debos, Suai Loro no Suai Camnasa, ita espera ho ida ne’e, ita nia komunidade iha suku tolu ne’e, kuaze uma kain rihun ida resin bele iha oportunidade hodi bele asesu ba bee moos”, dehan nia ba jornalista sira iha Edifisiu E BTL, E.P, Kaikoli, segunda horseik (05/12).
Atu labele prejudika projetu fíziku iha terrenu, Ezekutivu husu ba parte hotu hanesan, autoridade lokál no komunidade koopera, hodi apoia BTL, E.P no kompañia manan na’in, atu implementasaun projetu fíziku iha terrenu bele finaliza tuir tempu ne’ebé determina ona iha kontratu.
Alende ne’e, Prezidente BTL, E.P mós husu ba kompañia manan na’in, atu kumpri regras ne’ebé esbelese ona, katak, implementa projetu fíziku tuir termu kontratu no mós tenke garante kualidade projetu ne’e rasik, nune’e komunidade sira iha fatin refere bele utiliza ba tempu naruk.
Iha fatin hanesan, Diretóra kompañia Jufado Unipessoal Lda, Delfina Amaral Lopes promote, sira prontu atu ezekuta servisu refere, hodi finaliza tuir dezeñu no tempu ne’ebé estabelese ona iha kontratu laran.
Nia akresenta, iha tempu badak kompañia sei hahú projetu fíziku, maibé molok atu inisia projetu refere, kompañia rasik sei prepara uluk materiál ne’ebé ho kualidade no ida ne’e la difikulta kompañia atu implementa projetu ne’e.
Tan ne’e, kompañia nafatin prontu atu implementa projetu refere.
Entretantu, projetu melloramentu sistema fornesimentu bee moos ne’e, sei implementa iha Postu Administrativu Suai Villa, Munisípiu Kovalima, ne’ebé sei kobre ba suku tolu, hanesan suku Debos, Loro no Camnasa.
Enkauntu, sistema bee moos ne’e, sei benefisia ba populasaun 7.500 inklui edifísiu administrasaun públika, ospitál referénsia Suai, eskola, igreja, loja no mós edifísiu sira seluk ne’ebé eziste iha Suai Villa.
Nune’e mós sistema bee moos ne’e, sei transforma ba sistema urbana, iha ne’ebé sei instala mós metru kontadór unidade 1.500 ba benefisiáriu sira.
Projetu melloramentu sistema fornesimentu bee moos ne’e, sei gasta orsamentu $ 839,334.8 ho durasaun fulan neen no rekursu bee ne’ebé sei kanaliza ba Suai Villa mai husi bee matan Ladi no Sukabi-Laran, ne’ebé sei halo perfurasaun ba rekursu bee ne’e ho kapasidade kada posu 12 Lps, maibé bomba sei halo operasaun troka malu. No sei halo instalasaun ba kanu transmisaun ho distánsia metru 2255 (2255m) no mós kanu distribuisaun ho distánsia kilómetru 22.672. (22.672km).
