Tuir komunikadu ne'ebé Online INDEPENDENTE asesu, Diretóra Misaun USAID Timor-Leste Zema Semunegus, hatete, hanesan nasaun demokrátiku ida ne’ebé vibrante, Timor-Leste hakat liu ona dalan ida ne’ebé esepsionál hodi promove dignidade no espresaun nia sidadaun sira nian no iha tempu hanesan kontinua servisu atu hametin sira nia instituisaun demokrátika sira.
“Hodi apoia esforsu hirak ne’e, USAID kontente atu fornese tokon $1.25 hodi ajuda Timor-Leste atu fasilita eleisaun parlamentar ne’ebé inkluzivu, livre, justu, no kredivel,”Online INDEPENDENTE sita iha komunikadu, segunda ne’e (04/12).
Eleisaun parlamentár tinan 2023 nian sai nu’udar eleisaun daruak ne’ebé hala’o iha Timor-Leste durante pandemia Covid-19. Bainhira Timor-Leste hametin tan ninia demokrasia hodi avansa ba eleisaun importante ida ne’ e, USAID sei ajuda sidadaun ida atu ezerse sira nia direitu votu nian ho seguru no iha tempu hanesan promove lejitimidade no transparénsia ba prosesu eleitorál.
Entretantu, liu husi atividade ne’e, USAID sei fó prioridade ba peskiza opiniaun no formasaun ba kandidatu feto no joven sira atu ajuda halo kampaña hodi responde ba interese no preokupasaun sidadaun sira nian.
Aleinde, formasaun ba partidu polítiku sira no observador eleisaun lokal sira hodi ajuda garante transparénsia no integridade eleitorál.
Ho nune’e, USAID nia atividade edukasaun inklusivu ba votante no atividade divulgasaun informasaun sira, sei fornese informasaun eleitorál ne’ebé esensiál, sei motiva sidadaun sira atu partisipa iha eleisaun, no promove diálogu sidadaun ho partidu polítiku no mós kandidatu sira, nune’e votante sira bele informadu atu bele hili ka vota ho lolos iha loron eleisaun nian.
Tan ne’e, atividade edukasaun no observasaun eleitorál hotu, sei implementa ho koordenasaun ho órgaun jestor eleisaun Timor-Leste nian, hanesan, Komisaun Nasionál Eleisaun (CNE) no Sekretariadu Tékniku Administrasaun Eleitorál (STAE).
Nune’e, atividade “Apoia Eleisaun Parlamentár Inkluziva” ne’e sei uza programa entrevista televizaun ho naran Ko’alia Ba Ha’u! (“Talk to Me!”) atu fornese informasaun eleisaun ba votante rurál no urbana sira iha Timor-Leste.
Ho kolaborasaun parseiru Timoroan sira, programa edukasaun votante sei informa no hasae partisipasaun sidadaun sira nian iha eleisaun, ho foku ba feto, ema ho defisiénsia, votante rurál sira, lesbian, gay, biseksuál, transjéneru no interseksu (LGBTQI+) no joven sira.
Nune’e mós, ho parseria CNE no STAE, USAID sei promove mós elisaun ida ne’ebé seguru husi Covid, asesu inklusivu ba votasaun, atu asegura katak, grupu sira ne’ebé desfavoresidu bele partisipa ho másimu iha prosesu eleisaun ho foku espesiál ba inkluzaun defisiénsia sira iha eleisaun.
