Xefe Governu Xanana agradese iha periodu ukun aan 1999-2006, forsa Bangladesh hola parte iha misaun dame Organizasaun Nasoes Unidas (ONU) hodi apoia povu no nasaun Timor-Leste restaura ninia independensia.
PM Xanana mós agradese vizita dahuluk Ministru Negosiu Estranjeiru Bangladesh no ekipa delegasaun hamutuk Primeira Ministra Bangladesh, Sheikh Hasina nia oan feto primeiru Dotora Saima Wazed mai aprezenta aan ne'ebé iha futuru sei kandidata an ba Diretora Regional World Health Organization (WHO) ba Rejiaun Sudeste Aziátiku.
Timor-Leste rasik sei partisipa iha eleisaun ba lideransa WHO ne’ebé sei hala’o iha fulan-Outubru mai hodi apoia mós Dotora Saima.
“Hasoru malu ida ne’e mós hatudu katak ministru loke odamatan mai ita hodi hatene barak liután dezenvolvimentu iha setór oioin iha Bangladesh. Ha’u mós la imajina no foin primeiraves hatene katak nasauk kiik (Banglades) ho nia populasaun miliaun 170 maibé konsege susesu," dehan PM Xanana, hafoin enkontru ho Ministru Abdul Momen iha Palasiu Governu, Tersa (29/08).
Xefe Governu hatete, Bangladesh konsege sai nasaun ne’ebé dinamiku iha ekonomia, rekursu umanu, no área barak ne’ebé TL presiza estuda.
“Timor-Leste no Bangladesh la hanesan maibé saida mak sira halo iha Banglades mak ezemplu ne’ebé di’ak ba Timor-Leste hodi hatene sira nia komprimisiu no kapasidade,”tenik PM.
PM dehan, Bangladesh prontu ajuda Rai Timor-Leste husi Bolsa Estudu, agrikultura orgánika no parte saúde nian ho objetivu atu bele hametin liután relasaun bilaterál entre Timor-Leste ho Bangladesh.
Iha fatin hanesan, Ministru Negósius Estranjeirus Repúblika Populár Bangladesh, Abdul Momen apresia bele hasoru direita PM Xanana nu’udar lider mundiál ne’ebé halo esforsu ajuda rai barak no kria kooperasaun ho rai barak atu hadia dezenvolvimentu no povu Timor nia moris.
“Ami agradese hasoru malu ho Primeiru-Minisru Xanana, liu-liu hatene ninian sakrifisiu no dedikasaun ba libertasaun rai ida ne’e nian. Ami kontente tebes hasoru pessoal ida ne’ebé uniku. Ami hakarak fahe esperensia ho Governu Timor-Leste, nune’e bele hamutuk atinje mundu ida ne’ebé prosperu,” dehan Ministru Abdul.
Ministru Abdul afirma, dadaun ne’e problema mudansa klimátika no funu entre Ukraina no Rusia afeita mós ba Bangladesh ninia ekonómia, maibé povu, rai ne’ebé hakarak servisu ho Timor-Leste, nu’udar nasaun joven atu buka husu ba rai boot sira hodi hapara funu, nune’e labele afeita povu, liu-liu labarik no feto sira labele mate bebeik no sai vitima.
Iha oportunidade ne’e, Ministru Abdul Momen konvida Primeiru-Ministru Xanana atu halo vizita ba Bangladesh, hodi apoia malu halo konsultasaun kada tinan no halo diskusaun ba problema sira no fahe esperensia ba malu kona-ba asegura seguransa aihan no seluk tan.
