Diretór Operasaun AIFAESA.IP Virito Paulo hatete, operadór ekonómika sira hotu iha teritóriu Timor-laran tomak, provizoriamente ne'ebé AIFAESA suspende sirkulasaun produtu fós ho marka manu-vitoria, ho abertamente AIFAESA autoriza hikas sirkulasaun ka komersializasaun produtu fós ho marka manu-vitória ba Públiku.
Enkuantu, produtu fós manu-vitoria ne'ebé AIFAESA suspende provizóriu nia sirkulasaun iha merkadu liu husi konferénsia imprensa ne'ebé hala'o iha loron 7 fulan-Jullu 2023, ho razaun tanba produtu refere deskonfia iha kualidade ne'ebé la di'ak ka estragadu, tan ne’e.
Nune'e, liu husi orientasaun ho ordem Inspetór Jerál nian ba ekipa téknika sira rekolla amostra iha loja distributór Perissos Vitoria, Lda no mós loja retalista sira.
Tanba ne’e, ekipa téknika ho ordem servisu husi Inspetór Jerál nian ne'ebé orienta ekipa téknika sira transporta kedas amostra fós ho marka manu-vitoria ba BPOM-Kupang, iha loron 16 fulan-Jullu 2023, no entrega amostra refere iha loron 17 fulan-Jullu 2023, no mós ekipa téknika halo akompañamentu amostra ba teste laboratóriu refere.
"Husi rezultadu teste laboratóriu BPOM-Kupang/Indonesia no análiza téknika AIFAESA nian ne'ebé iha maka AIFAESA hakarak informa ba públiku katak, fós ho marka manu-vitoria la iha indikasaun ba kontaminasaun ho substánsia fizika no kimika ne’ebé prejudika ba ema nia saúde," dehan nia liu husi konferensia imprensa, iha Edifisiu AIFAESA.IP Matadoru, Tersa (29/08).
Diretór afirma, husi teste labortóriu ne'ebé hala'o iha BPOM-Kupang/Indonesia, rezultadu teste hatudu katak, jeralmente fós ho marka manu-vitoria iha "kondisaun di'ak" bazeia ba parametru ne'ebé rekomenda tuir padraun SNI nomós Codex Alimentarius nian.
Tan ne'e, AIFAESA rekomenda ba importadór fós sira hotu atu bele halo klarifikasaun ba públiku ligadu ho kualidade fós antes fa'an bainhira iha mudansa ruma.
"Ba Konsumedór sira hotu iha teritóriu Timor laran tomak katak, provizoriamente ne'ebé AIFAESA rekomenda atu la sosa produtu fós ho marka manu-vitoria to'o anúnsiu rezultadu teste laboratoriu tuir mai, ohin AIFAESA fó sai ba públiku tomak bele sosa no konsumu hikas fós ho marka manu-vitoria refere, tanba rezultadu laboratóriu hatudu, di'ak ba ema nia saúde,”tenik nia.
Ho nunue'e, AIFAESA enkoraja ba operadór ekonómika no konsumidór sira hotu, atu bele servisu hamutuk ho autoridade kompeténsia sira hodi bele garante ai-han ne’ebé kualidade no seguru ba konsumu umanu.
Entretantu, iha fatin hanesan, Diretór kompañia Perissos ho Vitoria, Lda, James Jong hatete, papel kompañia nian durante ne'e atu kontribui ba seguransa ai-han iha rai-laran no kompañia iha responsabilidade atu hatama fós no sasan hotu liuliu alimentár.
Nia dehan, produtu sira ne'ebé kompañia antes atu hatama iha nasaun ida ne'e, sira mós iha ona sertifikadu ne'ebé ho kualidade tan ne'e sei la ameasa ba povu nia saúde.
Nia dehan, kompañia hanoin nia klientes sira tanba fós manu-vitoria ne'ebé AIFAESA suspende provizoriu ne'e, antes ne'e kompaña distribui ona ba nia kliente sira no hela de'it fós saka 100 ida mak AIFAESA ba halo inspesaun
"Tan ne'e, ami hanoin ami nia kliente sira, tanba fós ne'e sira hola ona maibé labele fa'an tutan fali no labele konsumu, ida ne'e mak hanesan impaktu boot Ida," dehan nia.
