Prezidente KSTL, Almerio Vila Nova, hatete, kona-ba problema salariu minimu hanesan deklarasaun husi SEFOPE nian iha semana rua liu ba dehan katak, iha loron 120 nia laran sira sei lori fila-fali esbosu salariu minimu ba Konsellu Ministru.
Nia dehan, salariu mínimu ne'e, lolos nia problema laiha ona tanba iha ona Konsellu Ministru, hein de'it atu aprova, maibé tanba nesesidade folin fós sa’e iha merkadu ne’ebé afeita tebes traballadór sira, tan ne’e mak KSTL ezize ba Governu atu hasa’e ona salariu minimu ba traballadór sira.
Nia espera katak, ho prezensa Governu da-sia atu kontinua de'it no la persiza halo peskiza tanba proposta salariu minimu $150 ne'ebé KSTL propoin ona iha tinan 2020 liu ba to'o 2023 ne'e.
“Ida ne'e Governu bele uza peskiza ne'e para atu bele aprova no halo revizaun ba ita nia salariu mininu ne'e, depois mak ita tau fali fundus halo perkiza foun", dehan nia iha salaun Luz Clarita, Acait, Tersa (29/08)
Nia haktuir, to'o ohin loron situasaun sasan nia folin kompara ho tinan hirak liu ba la hanesan, tanba to'o ohin loron mós salariu minimu traballadór nafatin ho $115.
"Bainhira Governu aprova salariu minimu ne'e labele iha situsaun inflasaun sasan folin sa'e nia laran, tanba salariu ne'e tenke dignu duni ba ema ne'e, bele moris duni. Labele ita simu tiha salariu depois susar nafatin, sosa fós la kotu no sasan seluk sosa la kotu", nia hato'o
Nia salienta, dadaun ne'e traballadór no funsionariu sira hein hela Governu atu hasa'e salariu minimu ne'e, tanba nesidade no situasaun ekonomia to'o ohin loron sa'e ba bebeik.
"Governu agora bele hatun taxa no hasa'e taxa, maibé ida ne'e, sei afeita nafatin ba povu kbiit la’ek, povu ne'ebe ho rendimentu minimu iha kraik sei susar nafatin, tanba ohin loron sasan nia folin ne'e,ita hetan inflasaun sa'e tinan barak nia laran ona. Ne'ebe salariu $115 la sustenta familia nia moris iha situsaun sasan folin sa'e", nia dehan.
Nia fundamenta, iha parte ida ema hotu ezije produtividade traballadór nian, maibé iha parte ida la hare ba kondisaun moris traballadór nian, tanba traballadór ida atu servisu di'ak persiza nutrisaun diak no saúde diak.
"Se bainhira Governu aplika ona salariu minimu ne'e, ha'u fiar katak ita nia ekonomia ne'e sei buras no forte liu tan no ha'u la fiar sei prejudika ba setór privadu sira tanba bainhira salariu minimu hasa'e ona entaun produtividade traballadór nian tenke sa'e", nia konklui.
Nia afirma, KSTL mós halo ona konsultasaun ho emprezariu no empregadór sira iha Dili laran hanesan Xineza no Indonezia sira relata katak, sira hein deit salariu mininu bainhira mak atu hasa'e.
"Sira hein atu kumpri no halo tuir lei ne'ebé iha no regulamentu ne'ebé iha, sira prontu atu halo tuir hodi aplika salariu ne'ebé hatur ona ba traballadór sira", hakotu nia.
