Sekretáriu Estadu Floresta Fernandino Vieira da Costa hatete, objetivu husi vizita ne'e atu haré produsaun viveirus kafé no pilotu agro floresta nian iha Suku refere.
Projetu pilotu ne’e atu kuda produtu oioin hodi halo konbinasaun produtu ba longu prazu, kurtu prazu no mós mediu prazu, hanesan, ai-nanas, aidila, aifariña, hudi no mós aihoris sira seluk.
"Bainhira produtu sira ne’e bo’ot ona mak foin kuda kafé iha nia klaran, mekanismu ida ne’e atu halo agrikultur sira labele depende de'it ba kafé, maibé sira mós bele ku’u produtu seluk ne’ebé kuda hamutuk ho kafe antes kafé tasak hodi ku’u" dehan Sekretáriu Estadu iha Suku Fatukeru, Tersa (29/08).
SEF akresenta, pilotu ida ne’e foun, pilotu ne’e lidera husi Team Leader Landell Mills (LM) husi Nasaun Portugal ne’ebé iha Timor-Leste Miguel Rodrigues Nogueira, pilotu ida ne’e di’ak tebes, nune’e iha tinan tuir mai haree pilotu ne’e nia progessu di’ak, bele ba implementa mós iha munisipiu seluk, hodi muda povu agrikultur sira nian Sistema kuda produtu.
Governante ne'e dehan, viveirus kafé-oan ne’ebé prepara ona sei ba kuda fali iha fatin sira ne’ebé halo rehabilitasaun kafé nian iha Munisipiu Ermera no mós produtu sira seluk ne’ebé sei kuda tuir pilotu.
Nia Hatutan, produtu viveirus Kafé, spesiaria, ai-fuan no ai-mahon ne’ebé prepara ona iha fatin refere.
Enkuantu, iha fatin viveirus iha kafe oan hamutuk rihun 300, vanilla rihun lima, ainanas rihun haat, aidila rihun ida, pimento rihun tolu, aikakeu rihun 30 no aisamtuku rihun 10, ne’ebé komesa halo ona nia viveirus.
Iha biban ne'e mós, SEF kontinua halo vizita ba rehabilitasaun kafé ne’ebé bo’ot ona.
“Kafé refere sei aparu fila-fali, atu kafé hun labele naruk liu másimu mak 1,50 metru no minimu 1 metru, atu nune’e agrikultura sira mai ku’u labele sa’e fali mak ku’u, liu husi tékniku sira ne’e bele hasa’e kuantidade no kualidade produsaun iha ita nia rai," katak nia.
Governante haktuir, tanba kafé Timor ne’e kualidade, maibé nia kuantidade presiza sei hadi’a.
"Ita hatene katak kafé ne'e rai hanesan primadona iha Timor no kafé Timor nia kualidade mós di'ak, maibé ita sei falta nia kuantidade ne'ebé ita sei presiza hadi'a," dehan Governante.
Nia dehan, IX Governu konstituisional nafatin iha responsabilidade iha programa ne'ebé mak aprova ona iha Parlamentu Nasionál atu kontinua nafatin rehabilitasaun no espansaun ba kafé sira iha Munisipiu.
Tan ne'e, SEF lori governu no mós Ministériu Agrikultura, Pekuaria, Peska no Floresta nia naran hodi nafatin iha komitmentu atu bele apoiu nafatin ba povu agrikultura sira, liu-liu oinsa halo rehabiilitasaun kafé halo espansaun no mós kapasita povu agrikultura sira atu bele koiñese liutan tekniku rehabilitasaun no manutensaun bá kafe.
