Enkuantu, iha prosesu teste ne’e konfirmadu ona katak tinta ne’e ho kualidade.
Prezidenti CNE José Agustinho Belo hatete, tinta endelévél ne'ebé atu uza ba eleisaun parlamentar ne’e teste ikus ona no iha tempu badak tinta ne’e sei to’o iha Timor-Leste.
“Teste ikus ba tinta ida ne'e, antes ita produz, ita iha ona konkordansia. Tinta endilevel ne'e kualidade tanba tinta ne'e la'os husi padraun Nasionál maibé internasionál, ne'ebé ita sempre uza ba eleisaun,”dehan nia iha Salaun Laline Larigutu, CNE, Kaikoli, kinta (30/03).
Iha fatin henesan, Diretór Jeral STAE, Acilino Manuel Branco hatete, atu garante eleisaun ida ne’ebé justu, kredivel no evita tentativa no infrasaun ruma, garantia mós katak material sira ne'ebé atu utiliza ne'e ho kualidade.
"Tanba ita hatene katak tinta ne'e, materia ida ne'ebé kategori hanesan sensitivu no mós importante, no sistema eleitoral iha Timor ne'ebé sei aplika hela forma manualmente," katak nia.
Entretantu, Reprezentante UNDP iha TL, Munkhtuya Altangerel hatete, tinta eleitoral ne'e uza ona iha nasaun barak, hanesan dalan ida ne'ebé seguru liu atu garante integridade eleisaun nian.
Entretantu, orsamentu ne'ebé Governu TL aloka hodi sosa tinta endilével ne’e ho montante hamutuk dolar amerikanu rihun $360, ba tinta botir 10.000.
