Prezidente Autoridade Nasionál Petróleu no Minerais (ANPM), Gualdino da Silva hatete, hala'o hela ligasaun inter-ministeriál sira hotu kona-ba preparativus ne’ebé sei halo hamutuk ho kompañia, tanba tinan kotuk governu deside ona atu tuur hamutuk ho sira nia parseiru Timor GAP, nune’e bele hala'o sira nia atividade kontratu ninian iha área Kovalima no mós Manufahi.
“Tinan oin ita sei halo preparasaun para halo perfurasaun, maibé iha tempu badak ne'ebé planeadu ona iha fulan Agostu too Outubru sei iha atividade peskiza maizumenus kilómetru 300”,dehan nia, iha knaar fatin, Ministériu Finansas, Ai-Tarak Laran, horisehik.
Tanba ne’e, konvida maluk sira husi parte relevante sira atu kapasita liután kooperasaun ne’e hodi tau hamutuk ho kompañia atu hanoin hanesan oinsá atu aprosima implementa programa peskiza ne’ebé atu hala'o iha tempu badak.
Nune’e, sei envolve mobilizasaun ekipamentu presiza mós koordenasaun husi fatin ba fatin, nune’e presiza koordenasaun atividade governu tomak atu bele iha entendimentu di’ak.
Primeiru maka kompañia tenke tau sira gabinete iha Timor no tenke rekruta tékniku sira no mós rekolla dadus hotu-hotu kona-ba poténsia rekursu petrolíferu nian, depois tenke dezenvolve dadus sira ne’e atu bele halo estudu liutan bele komprende natureza liuliu poténsia petrolíferu.
Nia dehan, perfurasaun ba fatin sira seidauk hatene tanba sira sei halo estudu iha fulan tolu nia laran, sei halo prosesamentu ba dadus sira ne’e depois sei halo tan interpretasaun foin bele hatene fatin sira ne’e.
