Atu labele moris nafatin iha situasaun hanesan, la'ós depende de’it ba PN maibé mós ba órgaun soberania seluk, tanba tuir informasaun governu prepara ona programa atu mai aprezenta maibé hein hela membru governu sira seluk.
Bainhira membru governu 13 ne’e mak simu hotu ona pose fiar katak governu mós lori daudaun ona programa mai debate. Remata tiha ne’e kontinua ho Orsamentu Jerál Estadu (OJE) hodi halo aprovasaun atu bele halo ona dezenvolvimentu nasionál.
“Ita agora moris ho osan duadesimu hein katak osan ne’e bele kobre nafatin to’o fulan Jullu. Kuandu laiha, hakarak ka lakohi ita tenke aselera tomada-de-pose ba membru governu ba etapa daruak nian”, dehan Arão, iha Uma Fukun PN, horisehik.
Nia hatutan, Primeiru Ministru, Taur Matan Ruak, propoin ona membru VIII governu konstitusionál 41 no membru 11 mak sei pendente hodi hein tomada pose daruak nian.
“Atu fó tomada-de-pose ba membru governu ne’e kompeténsia Prezidente Repúblika nian, tanba ne’e to’o bainhira mak atu fó pose ba membru ne’ebé sei pendente hela ne’e ita hotu hein”, dehan nia.
Iha fatin hanesan, Presidente Tribunál Rekursu (TR), Deolindo dos Santos hatete, nomeiasaun ba membru governu ne’e konstituisaun absolutamente atribui ona ba Prezidente Repúblika, tanba ne’e nia mak iha kompeténsia atu halo desizaun.
“Prosesu nomeiasaun no tomada pose ba membru governu ne’ebé nia lista pendente hela ne’e prosesu mais polítiku, tanba ne’e ha’u lakohi tama to’o iha ne’ebá”, dehan nia.
Ba membru governu hirak ne’ebé deskonfia envolve iha kazu ruma ne’e, Tribunál Rekursu labele antesipadamente pronunsia sai ema hirak ne’e sala ka loos, kona kazu ka lae, ne’e lei bandu atu fó sai.
