“Ba karreta prado ne’ebé deputadu III lejizlatura sira seidauk hatama ne’e pasti sei rezolve,” dehan Prezidente PN Arão Noe iha nia servisu fatin, Sesta (29/06).

Entretantu, karreta Prado ne’ebé eis deputadu balun uza to’o ohin loron seidauk entrega ba Parlamentu Nasionál no karreta hirak ne’e la hatene loos iha ne’ebé.

Iha lejislatura datoluk Parlamentu Nasionál foti desizaun atu halo leilaun ba karreta prado ne’ebé deputadu sira uza. Kada karreta leilaun ho folin $8.000. Maibé, hafoin mosu protesta husi públiku, ikus mai Konsellu Administrasaun PN anula prosesu leilaun ne’e.

Problema seluk mosu tanba eis deputadu balun hakarak intrega fila fali karreta ne’e, maibé seluk seidauk intrega. Karreta balun troka ona xapa matrikula PN nian ba xapa matrikula privadu.

“Prosesu (leilaun) ne’e la’o ona, karreta hirak ne’e sai ona privadu, ikus mai anula fali (leilaun) entaun desizaun ne’e nulu, eis deputadu sira lori ona karreta ne’e, balun keta fa'an tan tiha mós ita la hatene, la iha informasaun ona,” dehan Deputadu lejislatura dalima husi Bankada FRETILIN Joaquim dos Santos iha Parlamentu Nasionál, horseik.

Tuir deputadu ne’e, eis deputadu lejizlatura datoluk balun to’o oras ne’e seidauk hatama intrega karreta prado ne’e tanba sala husi Prezidente Parlamentu Nasionál sesante Adérito Hugo.

Tuir loloos, Joaquim dehan, molok atu halo desizaun presiza hanoin uluk lai sekuénsia hirak ne’ebé tuir mai, maibé Prezidente PN iha altura ne’ebá ansi loos hodi halo desizaun nune’e fó ultimatu ba deputadu sira atu kompleta administrasaun molok tama ba eleisaun.

Deputadu ne’e esplika, iha altura ne’ebá bainhira iha desizaun atu halo leilaun ba karreta prado, administrativamente eis deputadu sira tuir hotu ona nune’e karreta nia xapa matríkula tau hotu ona privadu.

“Kuandu prosesu ne’e la’o sosiedade sivíl no estudante sira fó presaun, nia (Hugo) la konsege halo konsultasaun ho Konsellu Administrasaun Parlamentár hodi anula tiha desizaun (leilaun) ne’ebé antes ne’e konsellu administrasaun halo ona,” katak nia.

Iha fatin hanesan, Prezidente Bankada CNRT Duarte Nunes hatete, bankada CNRT haruka ona karta ba nia eis deputadu ne’ebé seidauk hatama karreta prado atu bele mai rezolve.

“Ami halo ona karta ba sira atu bele mai rezolve karreta hirak ne’e, tanba ne’e ami sei rezolve iha tempu badak nia laran,” nia promete.

Entretantu, eis Prezidente PN, Adérito Hugo hatete, nia lakohi fó komentariu ba asuntu ne’e tanba bele halo boot fila fali problema.

“Ha’u lakohi koalia tanba ha’u tama (koalia) fali orsida buat hirak ne’e sai boot fali. importante mak desizaun hirak ne’e tuir nia dalan,” dehan nia.