Diretór Ezekutivu JSMP Luis Oliveira de Sampaio hatete, jestu polítiku ne’ebé Xefe Estadu halo reprezenta preokupasaun públiku nian, tanba hakarak governu agora ne’e tenke ho kredibilidade atu bele serve povu.

“Iha negosiasaun entre Primeiru Ministru ho Prezidente rasik, atu nune’e bele evita konfuzaun”, dehan nia, iha knaar fatin, Kolmera-Dili, horisehik.

Tanba ne’e, nia dehan, ema hotu-hotu kongratula inisiativa prezidente nian, karik ne’e mak konsege Estadu labele impede kuandu iha julgamentu laran. Tanba membru governu balun mós agora daudaun ne’e sira mós iha ona prosesu julgamentu nia laran.

Tuir nia, desizaun Xefe Estadu ne’e di'ak tanba membru governu foun mai ho postura ne’ebé ho konfiansa públiku nian. Labele iha mal administrasaun, nepotizmu no seluk tan.

PR Lú-Olo Laiha Kompeténsia

Eis Prezidente Repúblika, José Ramos Horta hateten, Prezidente Repúblika laiha kompeténsia atu veta kandidatu membru governu ne’ebé Primeiru Ministru propoin.

“Prezidente Repúblika laiha kompeténsia atu veta membru ruma ba governu, maibé Prezidente Repúblika hanesan rekomenda de’it ba governu atu haree didi’ak lista membru ba governu”, dehan nia.

Nia hatutan, Xefe Estadu sei kontinua halo diálogu ho Primeiru Ministru atu hetan solusaun ba situasaun ne’e. Tanba Prezidente Repúblika bele laiha kompeténsia la'ós nia kbiit nia intensaun atu veta.

Maibé, Prezidente Repúblika mós iha obrigasaun konstitusionál atu haree governu sé maka tama tenke iha integridade atu fó kredibilidade ba governu.

Atu rezolve situasaun ne’e, prezidente ho primeiru ministru halo diálogu sira sei hetan solusaun ida. Buat ne’e la'ós komplikadu tebe-tebes rai ne’e ki'ik kleur ona laiha governu ida ho estabilidade, kontinuidade, governu ida tenke forte.

Ne'e duni, Ramos espera Prezidente Repúblika ho nia kna’ar nu’udar Xefe Estadu ho Primeiru Ministru bele halo diálogu atu sai governu ida forte atu bele aguenta tinan lima ne’e nia laran.