Hanesan fó sai iha newsroom.co.nz, Tersa (3/7) ho analiza Kornel Kerry Mckee nian hatete, ho Prezidente Repúblika (PR), Francisco Guterres Lú-Olo nia kona-ba pozisaun kona-ba lista membru governu ne’ebé pendente tanba pesoál sira iha kazu no situasaun, Taur Matan Ruak hanesan boneka Xanana Gusmão nian.
Tuir Kerry posibilidade boot akontese golpe Estadu iha Timor Leste bainhira governu mantein pozisaun.
“Sira dehan halo golpe ne’e ha’u nunka atu halo golpe ida, tanba tiru malu ne’e mós sente baruk ona durante 24 nia laran. Agora mesak Timor oan de’it atu se kilat malu ne’e sente difisil,” dehan Jenerál Lere iha Palasiu Prezidensiál, Bairru-Pité, horisehik.
Nia esplika, iha loron rua liu ba, Governu Nova Zelándia dada fila nia kornel ne’ebé servisu hanesan asesór ba iha F-FDTL tanba komete irregularidade.
Tan ne’e, analiza Koronél Nova Zelándia ne’e hanesan espekulasaun.
Ho situasaun ne’ebé akontese Embaixadór Nova Zelándia mós husu ona deskulpa no ida ne’e la tau kestaun maibé iha opiniaun públiku maka mundu hotu bele hatene.
Entretantu, Timor Leste kontinua hametin nafatin kooperasaun ho Nova Zelándia importante maka tenke respeitu malu.
Preokupa MDS Seidauk Simu Pose
Entretantu, Xefe Estadu Maiór Jenerál F-FDTL, Majór Jenerál Lere Anan Timur mós preokupa ho Ministru Defeza no Seguransa (MDS), tanba seidauk simu pose hodi prejudika servisu militár nian.
Kona-ba ezonerasaun ba Brigadeiru Jenerál Filomeno Paixão ne’e maka Primeiru Ministru (PM) rasik entrega ona karta ba Prezidente Repúblika (PR), Francisco Guterres Lú Olo.
Antes atu ezonera, Prezidente Repúblika sei konvoka reuniaun konsellu superiór defeza seguransa nian hodi rona no hein de’it tomada de pose.
Tan ne’e, hato’o ba Prezidente Repúblika (PR) sira nia preokupasaun maka kona-ba Ministru Defeza ne’e seidauk simu pose tanba ministru anteriór labele halo servisu, tanba VIII governu simu ona pose no halo ona servisu.
Tuir planu, iha loron 10 Jullu 2018, Prezidente Repúblika (PR) sei dezloka ba Portugál, entaun antes atu ba tenke fó uluk pose ba Ministru Defeza no sira seluk.
